22 नोव्हेंबरपासून बॉर्डर गावस्कर ट्रॉफीला सुरुवात होणार आहे. यासाठी टीम इंडिया ऑस्ट्रेलियाच्या दौऱ्यावर गेलीये. या सिरीजमधील पहिला सामना पर्थच्या मैदानावर खेळवला जाणार आहे. मात्र या सामन्यापूर्वी टीम इंडियाला मोठा धक्का बसला आहे. या सिरीजपूर्वी टीमच्या एका खेळाडूला दुखापत झालीये.

टीम इंडियाच्या महत्त्वाच्या खेळाडूला दुखापत

गुरुवारी भारताच्या प्रॅक्टिस सेशनवेळी फलंदाजी करताना भारताचा मिडल ऑर्डर फलंदाज सर्फराज खानला दुखापत झालीये. सरफराजच्या कोपराला ही दुखापत झाल्याचं समोर आलं आहे. परंतु यावेळी त्याला एमआरआयची आवश्यकता नव्हती. 'फॉक्स क्रिकेट'ने पोस्ट केलेल्या व्हिडिओमध्ये मुंबईचा सरफराज नेटमधून बाहेर पडत असून त्याने त्याचा उजवा हात धरला होता.

सरफराजची दुखापत किती गंभीर?

मिळालेल्या माहितीनुसार, दुखापत गंभीर नसून फलंदाजाला एमआरआय करण्याची गरज नसल्याची माहिती मिळाली. यावेळी पहिल्या टेस्ट सामन्यात टीम इंडियाचा कर्णधार रोहित शर्माच्या खेळण्याबाबत साशंकता असल्याने पर्थमध्ये बॉर्डर-गावस्कर ट्रॉफीच्या पहिल्या टेस्टमध्ये सरफराज खेळू शकतो. जर रोहित सिरीजमधील पहिल्या सामन्यासाठी उपलब्ध नसेल तर लोकेश राहुलला यशस्वी जयस्वालसोबत ओपनिंगची संधी देण्यात येईल. यावेळी मिडल ऑर्डरमध्ये सरफराज खान खेळू शकतो.

सरफराजसाठी ही सिरीज आव्हान

सरफराजने देशांतर्गत क्रिकेटमध्ये आतापर्यंत चांगली कामगिरी केली आहे. यावेळी उत्कृष्ट कामगिरीमुळे भारतीय टीममध्ये स्थान मिळवलं. न्यूझीलंडविरुद्धच्या घरच्या सिरीजमध्येही त्याने पहिलं टेस्ट शतक झळकावलं. मात्र ऑस्ट्रेलियाविरूद्धची ही सिरीज सरफराजसाठी आव्हान असू शकते.

फेब्रुवारी महिन्यात सरफराजने टेस्ट क्रिकेटमध्ये डेब्यू केलं होतं. यावेळी सहा सामन्यांत 37.10 च्या सरासरीने 371 रन्स केलेत. बंगळुरूमधील शतकाव्यतिरिक्त सरफराजला न्यूझीलंडविरुद्धच्या इतर पाच डावांमध्ये संघर्ष करावा लागला.