आयसीसी टी-२० वर्ल्डकप २०२४ स्पर्धा सुरु व्हायला अवघे काही दिवस शिल्लक राहिले आहेत. ही स्पर्धा सुरु होण्याआधी दिग्गज क्रिकेटपटूंनी विजेत्या संघाबाबत आणि सेमीफायनलमध्ये कोणते संघ जाणार याबाबत भविष्यवाणी करायला सुरुवात केली आहे.

आता बीसीसीआयचे सचिव जय शहा यांनी देखील टी-२० वर्ल्डकप स्पर्धेच्या सेमीफायनलमध्ये कोणते ४ संघ जाणार याबाबत भाष्य केलं आहे. आपल्या आवडत्या संघांमध्ये त्यांनी गेल्या हंगामातील विजेता आणि उपविजेता इंग्लंड आणि पाकिस्तान या दोन्ही संघांचं नाव घेतलेलं नाही. कोणते आहेत ते ४ संघ? जाणून घ्या.

टाइम्स ऑफ इंडियाला दिलेल्या मुलाखतीदरम्यान जय शहा यांना कोणते ४ संघ सेमीफायनलमध्ये जाऊ शकतात? असा प्रश्न विचारण्यात आला होता. या प्रश्नाचं उत्तर देताना भारत, ऑस्ट्रेलिया, न्यूझीलंड आणि वेस्टइंडीज या ४ संघांची नावं घेतली आहे. यादरम्यान त्यांनी इंग्लंड आणि पाकिस्तान या दोन्ही संघांचं नाव घेतलेलं नाही. या दोन्ही संघांनी गेल्या हंगामात फायनलमध्ये प्रवेश केला होता.

भारतीय संघाच्या सध्याच्या फॉर्मबाबत विचारण्यात आलेल्या प्रश्नावर बोलताना जय शहा म्हणाले की, ' भारतीय संघात फॉर्म आणि अनुभव यांचं चांगलं कॉम्बिनेशन आहे. निवडकर्ते केवळ आयपीएल स्पर्धेतील कामगिरीच्या बळावर संघाची निवड करु शकत नाही. कारण परदेशात खेळण्याचा अनुभवही असायला हवा.'

या मुलाखतीदरम्यान त्यांना आवडत्या भारतीय क्रिकेटपटूंबाबत प्रश्न विचारण्यात आला होता. त्यावेळी त्यांनी सचिन तेंडुलकर, एमएस धोनी आणि सुनील गावसकर यांचं नाव घेतलं. तर वर्तमान संघाचत विराट कोहली, रोहित शर्मा,जसप्रीत बुमराह आणि हार्दिक पंड्या हे त्यांचे आवडते खेळाडू असल्याचं त्यांनी सांगितलं.