तिरंदाज दीपिका कुमारीने (Deepika Kumari) सोमवारी वर्ल्ड आर्चरीच्या ताज्या जागतिक क्रमवारीत अव्वल स्थान मिळविले आहे. (World Archery Rankings) या पराक्रमासह तिने गेल्या तीन महिन्यांमधले तिसरे सुवर्णपदक (Gold Medal) मिळवले आहे. रविवारी पॅरिसमधील आर्चरी वर्ल्ड कप स्टेज 3 मध्ये तिने सुवर्ण पदकाची हॅटट्रिक पूर्ण केली आणि रिकर्व्ह वैयक्तिक स्पर्धा 6-0 ने जिंकली.

भारताची स्टार आर्चर दीपिका कुमारीने रशियाच्या एलेना ओसीपोवाचा 6-0 असा धुव्वा उडवला. 2021 मधील दिपिकाचे हे दुसरे वैयक्तिक विश्वचषक पदक आहे. रविवारी महिला मिश्र संघ स्पर्धेत सुवर्णपदक जिंकले गेले आणि वर्षातील तिसरे सुवर्णपदक पटकावले.

“मी आनंदी आहे, पण त्याच बरोबर मला माझी कामगिरी अशीच पुढे चालू ठेवावी लागेल. मला त्यात सुधारणा करायची आहे, कारण आगामी स्पर्धा आमच्यासाठी खूप महत्वाची आहे. मला जे काही शक्य आहे ते शिकण्याचा प्रयत्न मी करीत आहे, असे वर्ल्ड आर्चरीच्या अधिकृत संकेतस्थळाशी बोलताना दिपीका कुमारी म्हणाली.

यापूर्वी दीपिका आणि अतानू या जोडीने गॅब्रिएला स्लोएसर आणि स्जेफ व्हॅन डेन बर्ग या डच जोडीचा 5-3 ने पराभव करून प्रथम विश्वचषकात सुवर्णपदक जिंकले. भारताच्या दीपिका कुमारी, कोमलिका बारी आणि अंकिता भकत यांचा समावेश असलेल्या महिलांच्या रिकर्व्ह टीमने फ्रेंच राजधानीच्या तिरंदाजी विश्वचषकात तिसर्‍या फेरीत सुवर्णपदक मिळवले. अंतिम सामन्यात या संघाने मेक्सिकोला 5-1 ने पराभूत केले. आगामी स्पर्धा अर्थातच टोकियो 2020 ऑलिम्पिक स्पर्धा आहे. त्यास एक महिन्यापेक्षा कमी कालावधी बाकी आहे.

Edited By : Pravin Dhamale