Video : भटक्या कुत्र्याला खायला दिल्याच्या रागात एका व्यक्तीने महिलेला मारहाण केली. त्याने महिलेच्या अनेकदा कानशिलात लगावली. या घटनेचा व्हिडीओ सोशल मीडियावर व्हायरल होत आहे. व्हायरल व्हिडीओची माहिती मिळाल्यानंतर पोलिसांनी संबंधित कलमांखाली आरोपीविरुद्ध गुन्हा दाखल केला आहे. या प्रकरणी पोलिसांनी आरोपीला ताब्यात घेतले आहे.

मिळालेल्या माहितीनुसार, गाझियाबादच्या विजयनगर पोलीस स्टेशन हद्दीतील सिद्धार्थ विहार येथील ब्रह्मपुत्र एन्क्लेव्ह सोसायटीमध्ये ही घटना घडली आहे. एक श्वानप्रेमी महिला सोसायटीमधील भटक्या कुत्र्यांना जेवण खायला घालत होती. या दरम्यान एका व्यक्तीने महिलेला थांबवण्याचा प्रयत्न केला. महिलेशी त्या व्यक्तीचा वाद झाला. महिलेच्या वक्तक्यावरुन हा व्यक्ती इतका भडकला, की त्याने महिलेला कानाखाली मारायला सुरुवात केली.

व्हायरल व्हिडीओमध्ये ही व्यक्ती महिलेला सतत कानाखाली मारत असल्याचे पाहायला मिळते. मारहाण सुरु असताना महिला कोणालातरी संपूर्ण घटनेचा व्हिडीओ बनवण्यास सांगताना दिसते. घटनेचा व्हिडीओ बनवत असल्याचे समजल्यावर तो महिलेला सोडतो आणि आणखी व्हिडीओ बनवा असे कॅमेऱ्यामध्ये बघून ओरडतो. आसपासच्या लोकांच्या हस्तक्षेपानंतर हा वाद शांत झाला होता.

हा व्हिडीओ कोणीतरी सोशल मीडियावर अपलोड केला. व्हिडीओ प्रचंड व्हायरल झाल्याचे म्हटले जात आहे. या घटनेची दखल घेत विजय नगर पोलीस स्टेशनने महिलेशी गैरवर्तन करत तिला मारहाण करणाऱ्या आरोपी व्यक्तीवर गुन्हा दाखल केला. सदर व्यक्तीला ताब्यात घेण्यात आले आहे. या प्रकरणात पुढील कारवाई सुरु आहे.