एलपीजी गॅसची सबसिडी जमा झाली आहे की नाही, हे तपासण्यासाठी बँकेत गेलेल्या एका महिलेला धक्का बसला, ज्याची त्या महिलेने स्वप्नातही कल्पना केली नसेल. बँक खात्याचे पासबुक प्रिंट करताच खात्यात तब्बल १०० कोटी रुपये जमा झाल्याचे समोर आले अने त्या महिलेच्या पायाखालची जमीन सरकली. पासबुकवरील ही चक्रावणारी रक्कम पाहून महिला आणि तिचे कुटुंब हादरून गेले.

मिळालेल्या माहितीनुसार, पश्चिम बंगालमधील ३६ वर्षांची महिला नेहमीप्रमाणे आपल्या गॅस सबसिडीचे पैसे खात्यात आले की नाही? हे पाहण्यासाठी बँकेत गेली होती. पण त्या महिलेने पासबूकवरील शिल्लक रक्कम (बॅलन्स) पाहिला अन् विश्वासच बसला नाही. कारण तेव्हा तिच्या खात्यात १०० कोटींहून अधिक रक्कम जमा झाल्याचे दिसत होते. एकाच रात्रीत खात्यात इतकी मोठी रक्कम आल्याचे पाहून बँक कर्मचाऱ्यांचेही अवाक झाले. ही रक्कम बँकेच्या चुकीमुळे महिलेच्या खात्यात जमा झाली का? की यामागे वेगळे कारण आहे? याचा तपास आता बँकेचे अधिकारी आणि प्रशासनाकडून केला जात आहे. या धक्कादायक घटनेची सध्या संपूर्ण परिसरात जोरदार चर्चा सुरू आहे.

३६ वर्षीय काश्मिरा शेख या महिलेच्या खात्यात १०० कोटींची रक्कम जमा झाल्याचे समोर आले आहे. काश्मिरा आपल्या एलपीजी सिलेंडरवरील सबसिडी जमा झालेली पाहण्यासाठी बंगालच्या दक्षिण २४ परगणा जिल्ह्यातील पीएनबीच्या कुलतली जामताला शाखेत गेल्या होत्या. पासबुक प्रिंट झाल्यानंतर बँक अधिकाऱ्याने त्यांच्या खात्यात ९९,९९,९९,९९७ रुपये जमा झाल्याचे सांगितले. यावर काश्मिराला आणि त्या बँक अधिकाऱ्यालाही विश्वास बसला नाही. त्याने अनेकदा रक्कम तपासली पण खात्यावर १०० कोटी दाखवत होते.

नवऱ्याच्या पिशव्या शिवण्याच्या व्यावसायाला हातभार लावण्यासाठी काश्मिरा मदत करते. पण आता १०० कोटींची मालकीन झाली आहे. बँकेने चौकशीनंतर तिचे एकमेव बँक खाते गोठवले. काश्मिरा आपल्या खात्यात जमा झालेले पैसे वापरू शकत नाही. अनधिकृतपणे यामागे संपूर्ण बंगालमधील बँकिंग व्यवहारांवर परिणाम करणाऱ्या सर्व्हरमधील संभाव्य बिघाडाला जबाबदार धरले जात आहे. पीएनबीच्या अधिकाऱ्यांनी सांगितले की, या 'प्रकरणाचा' आढावा घेतला जात आहे, परंतु बँकेने अद्याप कोणतेही अधिकृत निवेदन दिलेले नाही.