Weather Forecast News : भारतातील अनेक ठिकाणी हवामानात बदलणार असल्याचा अंदाज वर्तवला जात आहे. उत्तरेकडील विविध राज्यांमध्ये मुसळधार पाऊस आणि हिमवृष्टी होणार आहे. यामुळे डोंगराळ राज्यांमध्ये जनजीवन विस्कळीत होऊ शकते असे हवामान विभागाने म्हटले आहे. मैदानी भागांमध्येही पर्जन्यवृष्टी होऊ शकेल असे म्हटले जात आहे.

हवामान विभागाचे शास्त्रज्ञ डॉ सोमा सेन यांनी ANI ला दिलेल्या माहितीनुसार, एक तीव्र वेस्टर्न डिस्टर्बन्स उत्तर भारतातून जात आहे. यामुळे हवामानात बदल होणार आहे. उत्तराखंड, उत्तरप्रदेश, बिहार आणि पश्चिम बंगालच्या मध्य भागांमध्ये पाऊस पडण्याची शक्यता आहे. अरुणाचल प्रदेशमध्ये मुसळधार पाऊस पडणार आहे. दक्षिण भारतातही पाऊस पडण्याचा अंदाज वर्तवला जात आहे.

उत्तरप्रदेश आणि बिहारमध्ये ताशी ३०-४० किलोमीटर वेगाने वारे वाहतील, वादळ आणि विजांचा कडकडाट होण्याचाही हवामान खात्याने इशारा दिला आहे. छत्तीसगडमध्ये गारपीट पडण्याची शक्यता आहे. हिमाचल प्रदेश आणि उत्तराखंडमध्ये मुसळधार पाऊस पडेल. दरम्यान महाराष्ट्रातील बहुतांश भागांमध्ये उष्ण वातावरण राहील.

उद्या रात्रीपासून म्हणजे २ मार्चपासून एक नवीन वेस्टर्न डिस्टर्बन्स उत्तर-पश्चिम भारताला धडकणार आहे. त्यामुळे हवामानात बदल होईल. जम्मू आणि काश्मीर, लडाख, हिमाचल प्रदेश, उत्तराखंड या राज्यांत २ ते ४ मार्च तर हिमाचल प्रदेशात ३ मार्चला मुसळधार पाऊस पडेल. अरुणाचल प्रदेश, आसाम, नागालँडमध्ये पर्जन्यवृष्टी असेल. त्याशिवाय तमिळनाडू, केरळ आणि लक्षद्वीप येथे २ मार्च रोजी पाऊस पडेल, असा अंदाज हवामान खात्याने वर्तवला आहे.