असं म्हणतात की लग्नाची गाठ स्वर्गात बांधली जाते. तसेच अनेक महिला आपल्या पतीला दीर्घायुष्य लाभावं, जन्मोजन्मी एकच नवरा मिळावा यासाठी वटपौर्णिमेला उपवास करून वडाची पूजा करतात. मात्र एका वैतागलेल्या व्यक्तीने चक्क बायको पासून सुटका मिळवण्यासाठी देवाला प्रार्थना करत नवस केला. देवाकडे मागितलेली मागणी पूर्ण झाली म्हणून, त्याने आपल्या गावापासून ९ किलोमीटर लांब असलेल्या मंदिरात लोटांगण घालत नवस पूर्ण केला.

मिळालेल्या माहितीनुसार, ही घटना उत्तर प्रदेशातील सोनाहा पोलीस ठाण्याच्या हद्दीतील एका गावात घडली. सुरेश नावाच्या एका तरुणाचे दोन वर्षांपूर्वी लग्न झाले. या लग्नापासून सुरेश मानसिक तणावात होता. बायकोला वैतागून त्याने गावापासून ९ किलोमीटर लांब असलेल्या देवीच्या प्राचीन मंदिरात जाऊन आगळावेगळा नवस केला.

सुरेशने देवीकडे मागणी केली. "जर तू माझ्या बायकोपासून माझी सुटका केलीस तर मी लोटांगण घालत तुझ्या दर्शनाला येईन." काही दिवसांनंतर सुरेशची बायको त्याच्या पासून विभक्त झाल्याने त्याची इच्छा पूर्ण झाली.

देवीला केलेला नवस पूर्ण झाला म्हणून सुरेशने काहीही न खातापिता गावापासून ९ किलोमीटर लांब असलेल्या देवीच्या मंदिरात लोटांगण घालत प्रवास केला. यादरम्यान त्याच्या गुडघ्यांना दुखापत झाली, तरी पठ्ठया थांबला नाही. त्याने मंदिर गाठून देवीच्या चरणी नतमस्तक झाला. या आगळ्या वेगळ्या नवसाची गावभर चर्चा सुरु आहे.