अमेरिका, इस्रायल आणि इराणमध्ये आठवडाभर महायुद्ध सुरु आहे. दोन्हीकडून एकमेकांवर दमदार प्रत्युत्तर दिले जात आहे. अमेरिकेचे राष्ट्राध्यक्ष डोनाल्ड ट्रम्प यांनी काल म्हणजेच ७ मार्च शनिवारी दुपारी सांगितले की आजची रात्र इराणसाठी सर्वात वाईट रात्र असेल.या विधानानंतर काही तासांतच इस्रायलने इराणवर हल्ले सुरू केले. या हल्ल्यात इराणच्या तेल शुद्धीकरण प्रकल्पाला भीषण आग लागली, या आगीमुळे सर्वत्र धुराचे लोट पसरले होते. याचा व्हिडिओदेखील समोर आला आहे.

समोर आलेल्या व्हिडिओमध्ये, आगीचा भडका उडून आकाशात धुराचे काळे लोट पसरलेले पाहायला मिळत आहेत. तेहरानवरील हा आतापर्यंतचा सर्वात मोठा हल्ला असल्याचे म्हटले जात आहे. या हल्ल्याचा व्हिडिओ देखील सध्या समाजमाध्यमांवर व्हायरल होत आहे.

इराणच्या इस्लामिक रिव्होल्यूशनरी गार्ड कॉर्प्स (IRGC) ने शनिवारी रात्री सांगितले की, त्यांनी तेहरान येथील सुविधेवरील हल्ल्याचा बदला म्हणून इस्रायलमधील हैफा येथील एका रिफायनरीवर हल्ला केला आहे.

या हल्ल्याची झळ भारताला देखील लागली आहे. युद्धामुळे भारताच्या ऊर्जा आयातीवर मोठा परिणाम झाला आहे. भारतात पेट्रोल, घरगुती वापरातील सिलेंडर यासारख्या अनेक गोष्टींना युद्धाचा फटका बसला आहे. या युद्धाचा भडका आणखी वाढणार का? हे पाहणं महत्त्वाचं ठरेल.