उत्तर प्रदेश मधील कानपुर जिल्ह्यात एका बड्या व्यावसायिकाच्या मुलाने दारूच्या नशेत भरधाव वेगात, आलिशान कार चालवत अनेकांना उडवल्याची बातमी समोर आली आहे. या अपघातात ६ जण गंभीर जखमी झाले आहेत. पोलिसांनी तरुणाविरोधात आयपीसीच्या विविध कलमांखाली गुन्हा दाखल केला आहे. या तरुणाचे नाव शिवम मिश्रा असे आहे.

मिळालेल्या माहितीनुसार, आरोपी तरुणाचे नाव शिवम मिश्रा असे आहे. त्याचे वडील तंबाखूचे प्रसिद्ध व्यापारी आहेत. कानपूरच्या पॉश ग्वाल्टोली भागात, एका वेगाने येणाऱ्या लॅम्बोर्गिनी कारने एका बुलेटला आणि नंतर एका ऑटोरिक्षाला धडक दिली आणि नंतर ती अनियंत्रित होऊन फूटपाथवर जाऊन आदळली. या अपघातात ६ जण गंभीर जखमी झाले आहेत.

सदर घटना रविवारी दुपारी ३:१५ च्या सुमारास घडली आहे. या तरुणाची कार पोलिसांनी जप्त केली आहे. या घटनेनंतर, कार चालवणाऱ्या शिवम मिश्राला त्याच्या अंगरक्षकांनी तुटलेल्या खिडकीतून बाहेर काढले आणि तेथून नेले.

अपघाताच्या वेळी तो दारूच्या नशेत होता असा दावा घटनास्थळी असलेल्या लोकांनी केला. दोन वर्षांपूर्वी शिवम मिश्राच्या वडिलांच्या बंशीधर टोबॅको लिमिटेड कंपनीवर आयकर विभागाने छापा टाकला तेव्हा चर्चेत आला होता. कानपूर, दिल्ली, मुंबई आणि गुजरात या पाच राज्यांमधील २० ठिकाणी छापे टाकण्यात आले.