उत्तरप्रदेशच्या मिर्जापुरातून एक धक्कादायक बातमी समोर येत आहे. भाजप नेत्याला मारहाण केल्याप्रकरणी पोलीस निरीक्षकाला निलंबित करण्यात आलं आहे. भाजप नेत्याला मारहाण केल्यानंतर भाजप नेते आक्रमक झाले. त्यांनी कटरा पोलीस ठाण्यात ठिय्या मांडून घटनेचा निषेध व्यक्त केला. यावेळी भाजपच्या नेत्यांना समजवण्याचा प्रयत्न झाला. मात्र, त्यांनी आंदोलनातून माघार घेतली नाही. यानंतर पोलीस निरीक्षकाला निलंबित करण्यात आले.

मिर्झापूर जिल्ह्यातील नरघाट गावातील रहिवासी कृष्ण कुमार सिंह हे भाजप नगर मंडळ पश्चिमीचे महामंत्री या पदावर कार्यरत आहेत. त्यांनी सांगितले की, कामानिमित्त ते बँकेत गेले होते. यावेळी पोलीस इन्स्पेक्टर सुनील कुमार राय बँकेत आले होते. तिथे त्यांच्यासोबत बोलणं झालं.

नंतर त्यांना ओळखण्यात चूक झाल्यानंतर भाजप नेते बँक काऊंटरवर गेले. यानंतर संतप्त पोलीस इन्स्पेक्टर सुनील कुमार राय यांनी कृष्ण कुमार सिंग यांच्याशी असभ्य वर्तन केले. पोलिसांनी त्यांना शिवीगाळ करण्यास सुरूवात केली. नंतर कानशिलातही लगावली, असा आरोप कृष्ण कुमार यांनी पोलीस इन्स्पेक्टर सुनील राय यांच्यावर केला.

ही संपूर्ण घटना सीसीटीव्ही कॅमेऱ्यात कैद झाली आहे. पोलीस निरीक्षक त्यानंतर त्यांना पोलीस ठाण्यात घेऊन गेले. त्यांच्याकडील वस्तू जप्त केले. भाजप नेते आणि कार्यकर्त्यांना याची माहिती मिळताच त्यांनी पोलीस ठाण्यात धाव घेतली. तसेच ठिय्या मांडला.

माजी नगराध्यक्ष मनोज जयस्वाल यांनी सांगितले की, पोलीस निरीक्षकाने बँकेत कामावर गेलेल्या भाजप कार्यकर्त्यांशी गैरवर्तन केले. त्यामुळे पोलिसाच्या निलंबनाची मागणी करण्यात आली. या प्रकरणी एसएसपी सोमेन बर्मा यांनी निरीक्षकाला निलंबित करण्यात येईल, असे सांगितले. दोन तासांनंतर त्यांनी ठिय्या आंदोलन मागे घेतला.