मध्य प्रदेशातील उज्जैन येथे एका हॉटेलमध्ये भीषण दुर्घटना घडली आहे. देवास रोडवरील श्रीगंगा हॉटेलमध्ये फूड वेस्ट प्लांटच्या चेंबरमध्ये उतरलेल्या चार जणांचा मृत्यू झाला. गॅस गळतीमुळे ही दुर्घटना घडल्याचा प्राथमिक अंदाज व्यक्त केला जात आहे. या घटनेमुळे परिसरात खळबळ उडाली आहे.

मिळालेल्या माहितीनुसार, उज्जैनमधील देवास रोडवर श्रीगंगा हॉटेल आहे. या हॉटेलच्या मागच्या बाजूला कचरा जमा करण्यासाठी आणि त्याची विल्हेवाट लावण्यासाठी एक चेंबर तयार करण्यात आले होते. रात्रीच्या वेळी एक कर्मचारी या चेंबरमध्ये काही कामासाठी उतरला होता. मात्र, तो बराच वेळ बाहेर आला नाही. त्यानंतर त्याला वाचवण्यासाठी आणखी तीन जण चेंबरमध्ये उतरले. मात्र, चेंबरमध्ये विषारी गॅसमुळे आत गेलेले चारही जण बेशुद्ध पडले.

या घटनेची माहिती मिळताच पोलीस आणि प्रशासनाचे पथक घटनास्थळी दाखल झाले. सर्वांना चेंबरमधून बाहेर काढून रुग्णालयात नेण्यात आले. मात्र, डॉक्टरांनी चारही जणांना मृत घोषित केले. या दुर्घटनेत वाहिद, मनोज, कमलेश आणि नितीन यांचा मृत्यू झाला आहे.

उज्जैनचे पोलीस अधीक्षक प्रदीप शर्मा यांनी दिलेल्या माहितीनुसार, हॉटेलमधील कर्मचारी आणि बाहेरून कामासाठी आलेले काही लोक कचऱ्याच्या टाकीत उतरले होते. गॅस गळतीमुळे गुदमरून त्यांचा मृत्यू झाल्याची शक्यता असल्याचं पोलीस अधिकाऱ्यांनी म्हटलं . या दुर्घटनेमागचे नेमके कारण शोधण्यासाठी तपास सुरू करण्यात आला आहे. दरम्यान, श्रीगंगा हॉटेल गेल्या दहा वर्षांपासून सुरू आहे. या प्रकरणात हॉटेल व्यवस्थापनाची निष्काळजी समोर आल्यास संबंधितांवर कारवाई केली जाईल, असे प्रशासनाने स्पष्ट केले आहे. या घटनेमुळे हॉटेलमधील सुरक्षेचा प्रश्न पुन्हा एकदा ऐरणीवर आला आहे.