ANI Twitter Locked : देशातील आघाडीची वृत्तसंस्था एएनआयचे ट्विटर अकाउंट ब्लॉक करण्यात आले आहे. मायक्रो-ब्लॉगिंग वेबसाइटने शनिवारी दुपारी अचानक @ANI हँडल ब्लॉक केले.

यानंतर या अकाउंटवर गेल्यावर, हे अकाउंट अस्तित्वात नाही, असं लिहिलेलं दिसत आहे. एएनआयच्या संपादक स्मिता प्रकाश यांनी ट्वीट केले की, ट्विटरने एएनआयचे अकाउंट लॉक केले आहे. (Latest Marathi News)

प्रकाश यांनी एक स्क्रीनशॉट शेअर करत म्हटले आहे की, ट्विटरने अकाउंट तयार करणाऱ्याचे किमान वय १३ वर्षे असण्याचा नियम नमूद केला आहे. त्यांनी ट्विटरचे मालक इलॉन मस्क यांनाही टॅग केले आहे. पुढच्या ट्विटमध्ये स्मिता यांनी लिहिलं आहे की, 'आम्ही १३ वर्षांपेक्षा कमी वयाचे नाही!'

एएनआयने ट्विटरवर स्वतःचे वर्णन 'भारताची नंबर १ मल्टीमीडिया न्यूज एजन्सी' असे केले आहे. दरम्यान, एएनआय मुख्य ट्विटर अकाउंट लॉक झालं असलं तरी, एएनआय हिंदी, एएनआय डिजिटल, एएनआय एमपी-राजस्थान, एएनआय यूपी-उत्तराखंड इत्यादींचे इतर ट्विटर हँडल चांगले काम करत आहेत.