Madhya Pradesh: मध्य प्रदेशची राजधानी भोपाळ येथील काँग्रेस आमदार ओंकार मरकाम यांच्या बंगल्यावर एका विद्यार्थ्याने गळफास घेऊन आत्महत्या केल्याची धक्कादायक घटना घडली आहे. हा विद्यार्थी कॅन्सरने त्रस्त असून त्याच्यावर अभ्यासासोबतच आमदार निवासात उपचार सुरू होते. माहिती मिळताच पोलिसांनी घटनास्थळी धाव घेत मृतदेह ताब्यात घेऊन पोस्टमॉर्टमसाठी पाठवला. मृतदेहाजवळून पोलिसांना सुसाइड नोट सापडली आहे. (Madhya Pradesh)

याबाबत अधिक माहिती अशी की, रविवारी रात्री उशिरा ही घटना घडली असून संबंधित विद्यार्थी तिरथ गेल्या चार वर्षांपासून कॉंग्रेस (Congress) आमदाराच्या सरकारी निवासस्थानी राहत होता. तिरथ कॅंन्सरग्रस्त असून त्याच्यावर उपचारही सुरू होते. फाशी घेण्यापूर्वी त्याने वडिलांसाठी एक चिठ्ठी लिहून ठेवली होती. ज्यामध्ये त्याने पप्पा मला माफ करा, तुम्ही माझ्यासाठी खूप केले परंतु मीच कधी समजू शकलो नाही असे लिहले होते. या घटनेचा पोलिस अधिक तपास करत आहेत.

आपल्या सुसाईड नोटमध्ये तिरथने "मम्मी, पप्पा काकी मला माफ करा, मी कधीही चांगला मुलगा होऊ शकलो नाही, मी तुम्हाला खूप त्रास दिला आता मी जात आहे. पप्पा तुम्ही आईची आज्जीची काळजी घ्या, मी तुम्हाला अजून त्रास देवू शकत नाही, तुम्ही माझ्यासाठी खूप केले काही केले आहे, पण मला ते समजले नाही, माझी कोणाविरुद्ध काही तक्रार नाही, मी आजारपणाला कंटाळून आत्महत्या करत आहे," असे लिहले आहे,

त्याचबरोबर "पप्पा माझ्या मित्रांना सांगा आता तिरथ राहिला नाही," असे म्हणत त्याने त्याच्या मित्रांची नावेही लिहली आहेत. दरम्यान पोलिसांनी दिलेल्या माहितीनुसार या सुसाईड नोटची फॉरेंन्सिक तपासणी होणार असून त्यावरील अक्षर पिडित मुलाचेचं आहे का? त्याने कोणाच्या दबावाखाली येवून ही नोट लिहली आहे का? याबद्दलची माहिती या तपासात घेतली जाणार आहे.