Car Accident Death Toll : उत्तर प्रदेशमधील मुजफ्फरनगर जिल्ह्यात भरधाव कारमध्येच जिवंत जळून मृत्यू झाला. एका भरधाव कारचा भीषण अपघात होऊन ती डिव्हायडर आणि विजेच्या खांबाला धडकली. टक्कर इतकी जोरदार होती की, काही कळण्याच्या आतच कारला भीषण आग लागली. या जळालेल्या कारमध्ये अडकल्यामुळे सहा जणांचा जिवंत जळून जागीच मृत्यू झाला आहे.

नेमकी घटना कशी घडली?

मिळालेल्या माहितीनुसार, हरियाणामधील जिंद परिसरातील एक कुटुंब कारने हरिद्वारच्या दिशेने चालले होते. मुजफ्फरनगरमधील हायवेवरून जात असताना भरधाव कार अचानक अनियंत्रित झाली. कारचा वेग जास्त असल्यामुळे ती थेट रस्त्यावरील डिव्हायडर आणि विजेच्या खांबाला जाऊन धडकली आणि दुसऱ्या लेनमध्ये पलटी झाली.

टक्कर होताच कारमध्ये अचानक भीषण आग लागली. आगीने काही सेकंदांतच रौद्ररूप धारण केले आणि संपूर्ण कार जळून खाक झाली. कारचे दरवाजे लॉक झाल्यामुळे आत बसलेल्या प्रवाशांना बाहेर पडण्याची संधीच मिळाली नाही. आगीच्या लोटात सापडून कारमधील सहाही जणांचा तडपडून जिवंत मृत्यू झाला.

अपघात आणि आगीचा भडका उडालेला पाहून मार्गावरील काही नागरिकांनी आणि वाहनचालकांनी मदतीसाठी धाव घेतली. मात्र, आगीचे लोळ एवढे भयानक होते की कोणालाही कारच्या जवळ जाणे शक्य झाले नाही. घटनेची माहिती मिळताच पोलिसांनी आणि अग्निशमन दलाच्या पथकाने तात्काळ घटनास्थळी धाव घेत बरीच मेहनत करून आगीवर नियंत्रण मिळवले. मात्र तोपर्यंत सर्व जण जळून खाक झाले होते. या दुर्दैवी घटनेमुळे सर्वत्र हळहळ व्यक्त केली जात आहे.