बंगळुरूमध्ये इन्फोसिस कंपनीच्या इंजिनीअरला पोलिसांनी अटक केली. वॉशरूममध्ये जाऊन महिला सहकाऱ्याचा व्हिडीओ काढणाऱ्या इंजिनीअरला पोलिसांनी अटक केली. नागेश स्वप्निल माळी असं आरोपीचे नाव आहे. हा तरुण इन्फोसिस कंपनीमध्ये सिनिअर असोसिएट म्हणून काम करतो. या तरुणाच्या या घृणास्पद कृत्यामुळे कंपनीत खळबळ उडाली.

इंजिनीअरवर असा आरोप करण्यात आला आहे की, महिला कर्मचारी वॉशरूममध्ये गेली असताना तिला शेजारच्या वॉशरूममध्ये काही तरी संशयास्पद हालचाली दिसल्या. तिने डोकावून पाहिले असता आरोपी नागेश गुपचूप व्हिडीओ बनवत होता. यानंतर तिने आरडाओरडा केला. महिला कर्मचाऱ्याचा आवाज ऐकून कंपनीतील इतर कर्मचारी तिथे आले आणि नागेशला रंगेहाथ पकडले.

त्यानंतर सर्व कर्मचाऱ्यांनी आरोपी नागेशचा फोन तपासला असता त्यात त्यांना महिला कर्मचाऱ्याचा एक व्हिडिओ आढळला. महिला कर्मचाऱ्याच्या उपस्थितीत हा व्हिडीओ डिलीट करण्यात आला. आरोपीने यापूर्वी अनेक महिलांचे व्हिडिओ बनवले असण्याची शक्यता पोलिसांनी व्यक्त केली आहे. त्याचा फोन फॉरेन्सिक तपासणीसाठी पाठवण्यात आला आहे.

याआधी अयोध्येतही असाच एक प्रकार समोर आला होता. येथे एका गेस्ट हाऊसच्या कर्मचाऱ्याने एका महिलेला आंघोळ करतानाचा व्हिडिओ रेकॉर्ड केला होता. या महिलेला देखील काही संशयास्पद हालचाली दिसून आल्या. तिला कोणाची तरी सावली दिसली तेव्हा हा धक्कादायक प्रकरण उघडकीस आला.