अहमदाबादहून लंडनच्या दिशेनं निघालेल्या एअर इंडिया विमानाचा भीषण अपघात घडला. गुरूवारी दुपारी सरदार वल्लभभाई पटेल आतंरराष्ट्रीय विमानतळावरून उड्डाण घेतल्यानंतर काही सेंकदात भींतीला धडक देत मेघानीनगर परिसरात कोसळले. भीषण अपघातात मोठा स्फोट झाला आणि होत्याचं नव्हतं झालं. या अपघातात एकूण २६५ जणांचा मृत्यू झाला. ज्यात १२ क्रू मेंबर्स आणि २ पायलटचा समावेश होता. या अपघातात श्रद्धा धवन यांचा देखील दुर्देवी मृत्यू झाला आहे. त्या मुंबईतील मुलुंड येथील रहिवासी असल्याची माहिती आहे.

श्रद्धा धवन या एअर इंडियामध्ये सीनियर ग्रुप मेंबर होत्या. गेल्या २० वर्षांपासून त्या एअर इंडियामध्ये नोकरी करत होत्या. त्यांचाही या भयानक अपघातात मृत्यू झाला. त्यांच्या पश्चात पती, मुलगी आणि सासू- सासरे असा परिवार आहे. त्यांचे पती देखील एअर इंडियामध्येच कार्यरत होते. ड्युटी जॉईन करण्यापूर्वी त्यांनी आपल्या घरच्यांना फोन केला आणि फोनवर त्यांनी आपण लवकरच भेटू असं सांगितलं. मात्र, त्यानंतर त्यांचा भीषण अपघात घडला.

सध्या मृतदेहाची ओळख पटवण्यासाठी डीएनए टेस्ट केले जाणार आहे. या टेस्टद्वारे मृतांची ओळख पटवली जाणार आहे. या भीषण विमान अपघातात मृतदेहांची अवस्था कोळशाप्रमाणे झाली होती. काही मृतदेहांचे अवयव छिन्नविछिन्न अवस्थेत सापडले. त्यामुळे मृतांची ओळख पटवण्यास अडचण निर्माण होत आहे. त्यामुळे डीएनए टेस्टद्वारे मृतांची ओळख पटवण्याचे प्रयत्न केले जाणार आहे.

श्रद्धा यांच्या मृतदेहाची ओळख देखील डीएनए टेस्टद्वारे केली जाणार असल्याची माहिती आहे. श्रद्धा यांच्या मृत्यूनंतर त्यांच्या कुटुंबाला मोठा धक्का बसला आहे.

दरम्यान, या भीषण अपघातात एक प्रवासी सुदैवाने बचावला आहे. एएनआयनं दिलेल्या माहितीनुसार, विमानातील ११ A सीटवर बसलेले रमेश विश्वकुमार यांचे प्राण वाचले आहे. या अपघातानंतर डॉक्टरांची विशेष टीम त्यांच्या प्रकृतीकडे लक्ष ठेवून आहे.