प्रेमाचा प्रस्ताव नाकारल्याने माथेफिरू आरोपीने मुलीवर चाकूने वार करत ॲसिड हल्ला केलाय. ही धक्कादायक घटना आंध्र प्रदेशातील अन्नमय्या जिल्ह्यातील एका गावात घडली आहे. मुख्य म्हणजे मुलीचा साखरपुडा झाला होता. पोलिसांना शुक्रवारी या घटनेची माहिती मिळाल्यानंतर त्यांनी तपासाला सुरूवात केली आहे. या संतापजनक घटनेनंतर परिसरात एकच खळबळ उडाली आहे.

अन्नमय्या जिल्हा पोलिस अधीक्षक बी. कृष्णा राव म्हणाले, मदनपल्ली येथील रहिवासी गणेश (२४) याने शुक्रवारी सकाळी ७ वाजता पेरामपल्ली गावातील मुलीवर हल्ला केला. घटनेच्या वेळी मुलीचे पालक गुरे राखण्यासाठी गेले होते. पोलीस अधीक्षक म्हणाले, "त्या तरुणीचे नुकताच साखरपुडा झाला होता. तिने गणेशला सांगितले की तिला आता त्याच्यासोबत संबंध ठेवायचे नाहीत."

एसपी म्हणाले की, मुलीने सकाळी गणेशला तिच्या घरी बोलावले होते. गणेश संपूर्ण योजना आखून तिला भेटायला गेला होता. भेटीदरम्यान दोघांमध्ये वाद झाला. याच दरम्यान गणेशने तिच्यावर चाकूने हल्ला करत अंगावर ॲसिड ओतले.

मुलीवर ॲसिड ओतल्यानंतर आरोपी फरार झाला आहे. पोलिसांनी दिलेल्या माहितीनुसार, मुलीवर सात वेळा चाकूने वार करण्यात आले आहे. तसेच ॲसिड हल्ल्यात ती पूर्णपणे भाजली गेली. पोलिसांनी जखमी मुलीला उपचारासाठी बेंगळुरू येथील रुग्णालयात दाखल केले आहे. या घटनेचा अधिक तपास तसेच आरोपीचाही शोध पोलिस घेत आहेत.

या हल्ल्याचा निषेध करताना मुख्यमंत्री एन. चंद्राबाबू नायडू यांनी अधिकाऱ्यांना हल्लेखोराविरुद्ध कठोर कारवाई करण्याचे निर्देश दिले. "पीडित व्यक्तीवर चांगल्या उपचारांसाठी सर्व पावले उचलली पाहिजेत," असे मुख्यमंत्र्यांनी एका अधिकृत निवेदनात म्हटले आहे. "सरकार पीडिता आणि तिच्या कुटुंबासोबत उभे राहील," असंही मुखमंत्री म्हणाले.