पावसाळा संपला तरी देखील देशात पावसाचा कहर सुरूच आहे. ऐन दिवाळीत अनेक राज्यांना पाऊस झोडपून काढत आहे. आज देशातील सुमारे १४ राज्ये आणि केंद्रशासित प्रदेशांमध्ये पाऊस, ढगांचा गडगडाट आणि विजांचा कडकडाटासह पाऊस पडण्याची शक्यता आहे. दक्षिण भारतात तामिळनाडू आणि पुदुचेरीमध्ये मुसळधार पावसाचा इशारा हवामान खात्याने दिला आहे. या ठिकाणी वारे ताशी ४० ते ५० किलोमीटर वेगाने वाहू शकतात आणि वाऱ्याच्या झोतांचा वेग ताशी ६० किलोमीटरपर्यंत पोहोचू शकतो.

हवामान खात्याने देशातील १४ राज्यातील नागरिकांना सतर्क राहण्याचे आवाहन केले आहे. जम्मू आणि काश्मीर, लडाख, बिहार, झारखंड, पश्चिम बंगाल, सिक्कीम, आसाम, मेघालय आणि ईशान्येकडील इतर राज्यांमध्येही हलक्या ते मध्यम स्वरूपाच्या पावसाची शक्यता आहे. अंदमान आणि निकोबारमध्येही पाऊस पडण्याचा अंदाज आहे. काही ठिकाणी बर्फवृष्टीचाही अंदाज हवामान खात्याकडून वर्तवण्यात आला आहे.