Rahul Gandhi Priyanka Gandhi FIR Akashvani Bhawan : काँग्रेस नेते राहुल गांधी आणि प्रियंका गांधी वाड्रा यांच्याविरोधात दिल्ली पोलिसांनी गुन्हा दाखल केला आहे. आकाशवाणी भवनाच्या तक्रारीवरून दिल्ली पोलिसांनी राहुल गांधी-प्रियांका गांधी यांच्यासह इतर विरोधी नेत्यांवर गुन्हा (FIR) दाखल केला आहे. ६ ऑक्टोबर रोजी 'इंडिया' (INDIA) आघाडीच्या निवडणूक आयोग मार्चदरम्यान आकाशवाणी भवन परिसरात विनापरवाना प्रवेश केल्याचा आरोप त्यांच्यावर ठेवण्यात आला आहे.

मंगळवारी निवडणूक आयोगावर राहुल गांधींच्या नेतृत्वात मोर्चा काढण्यात आला. या मोर्चा काढणाऱ्या विरोधी पक्षांच्या नेत्यांना पोलिसांनी वाटेतच रोखले होते. यानंतर राहुल गांधी, प्रियंका गांधी आणि काही प्रमुख नेते अचानक आकाशवाणी भवनाच्या आवारात शिरले आणि तिथेच धरण्यावर बसले. तब्बल ९ तास चाललेल्या या ठिय्या आंदोलनानंतर दिल्ली पोलिसांनी राहुल गांधी आणि प्रियंका गांधी यांच्यासह अनेक नेत्यांना ताब्यात घेतले होते. आता या प्रकरणी पोलीस पुढील कायदेशीर कारवाई करत आहेत.

निवडणूक आयोगाविरोधात विरोधक आक्रमक: मुख्य निवडणूक आयुक्त (CEC) ज्ञानेश कुमार यांच्याविरोधात विरोधकांचे आंदोलन आजही सुरूच राहणार आहे. मतदार यादीतील 'एसआयआर' (SIR) प्रकरणावरून निवडणूक आयोगावर प्रश्न उपस्थित करत विरोधी पक्षांनी ज्ञानेश कुमार यांच्या राजीनाम्याची मागणी लावून धरली आहे. मंगळवारी झालेल्या मोर्च्यानंतर, आज आप काँग्रेस आणि डाव्या पक्षांनी दिल्लीच्या मुख्य निवडणूक अधिकारी कार्यालयावर पुन्हा निदर्शने करण्याची घोषणा केली आहे.