NEET पेपरफुटी आणि दिल्ली पोलिसांनी तरूणांवर केलेल्या अमानुष लाठीचार्ज प्रकरणी काँग्रेस चांगलीच आक्रमक झाली असून विरोधी पक्षनेते राहुल गांधी यांच्यासह काँग्रेसचे खासदार आंदोलणासाठी रवाना झाले.

पंतप्रधान मोदी यांच्या निवासस्थानाबाहेर आंदोलन करताना राहुल गांधी वेगळ्याच अंदाजात दिसले. कंबरेवर हात ठेवून त्यांनी सरकारविरोधात ठाम भूमिका घेतली. एकीकडे सीजेपीचे संस्थापक अभिजीत दीपके यांनी जंतर मंतरवर आंदोलन तीव्र केल्यानंतर आता त्याला काँग्रेसने देखील मोठा पाठिंबा देत राहुल-प्रियंका गांधी यांच्यासह इंडिया आघाडीचे प्रमुख नेते दाखल झाले.

आंदोलनादरम्यान राहुल गांधी यांनी उपस्थितांना संबोधित करत विद्यार्थ्यांना न्याय मिळवून देण्याची इच्छा असलेल्या सर्वांना या आंदोलनात सहभागी होण्याचे आवाहन त्यांनी केले.

आंदोलन सुरू झाल्यानंतर केंद्रीय राज्यमंत्री जितेंद्र सिंह यांनी घटनास्थळी येऊन राहुल गांधींना आंदोलन थांबवण्याची विनंती केली, त्यांच्यासोबत गृहसचिव गोविंद मोहनही उपस्थित होते. यावेळी राहुल गांधी यांनी जितेंद्र सिंह यांच्याकडे 5 प्रमुख मागण्या ठेवल्या.

यावेळी राहुल गांधी यांनी स्वतः सर्वांना प्लास्टिक नॉट वाटत प्रतीकात्मक बेड्या घालून आंदोलन केले. यावेळी त्यांनी शिक्षण मंत्र्यासोबत आता पंतप्रधान आणि गृहमंत्र्यांनीही राजीनामा द्यावा अशी मागणी राहुल गांधी यांनी केली.

आंदोलनाची तीव्रता पाहता दिल्ली पोलिसांनी राहुल गांधी यांच्यासह सर्व नेत्यांना मोठा घेराव घातला. यावेळी पोलीस आणि काँग्रेसच्या नेत्यांमध्ये झटापट देखील पाहायला मिळाली. अखेर पोलिसांनी राहुल गांधी यांच्यासह सर्व नेत्यांना ताब्यात घेत पोलीस व्हॅनमध्ये टाकले.