Hoshiarpur Bus Accident : पंजाबच्या होशियारपूरमध्ये सोमवारी मोठी दुर्घटना घडली आहे. प्रवाशांनी खचाखच भरलेली बस उलटून भीषण अपघात झाला. या दुर्घटनेत ८ जणांचा मृत्यू झाला. तर ३२ जण जखमी झाले. हाजीपूर रोडजवळील सगरा बस स्टँडजवळ हा अपघात झाल्याची माहिती मिळत आहे.

पोलिसांना माहिती मिळताच त्यांनी घटनास्थळी धाव घेतली. प्रशासनाचे अधिकारी देखील घटनास्थळी पोहोचले. पोलीस आणि स्थानिकांनी मिळून बचाव कार्य सुरु केलं. बसला क्रेनच्या मदतीने उचलून दबललेल्या प्रवाशांना बाहेर काढलं. त्यानंतर जखमी प्रवाशांना तातडीने रुग्णालयात दाखल केलं. त्यातील ८ जणांना डॉक्टरांनी मृत घोषित केलं.

दसूहाचे डीएसपी कुलविंदर सिंह यांनी अपघाताच्या घटनेला दुजोरा दिला आहे. बसमध्ये एकूण ३९ प्रवासी होते. मृतांमध्ये मायलेकीचाही समावेश आहे. दसूहा सिव्हिल रुग्णालयातील डॉक्टर मनमोहन सिंह यांनी सांगितलं की, मृतांमध्ये एका लहान मुलाचाही समावेश आहे. भीषण अपघातात काहींचा जागीच मृत्यू झाला आहे. तर काहींचा उपचारादरम्यान मृत्यू झाला.

बसचा वेग अधिक असल्याने अपघात झाल्याची माहिती मिळत आहे. अचानक कार समोर आल्याने बस चालकाचं नियंत्रण सुटलं. त्यानंतर बस उलटली. प्रत्यक्षदर्शीने सांगितलेल्या माहितीनुसार, एकेरी रस्त्यावर बसच्या समोर अचानक कार आली. बस वेगात होती. त्यामुळे बस चालकाला नियंत्रण करण्यास जमलं नाही. बसचा ताबा सुटल्याने प्रवाशांमध्ये एकच खळबळ उडाली. त्यानंतर बस उलटली.

अपघातानंतर स्थानिक लोक मदतीसाठी धावले. कारमधील प्रवासीही जखमी झाले आहेत. पोलिसांनी बस अपघातातील प्रवाशांचे मृतदेह ताब्यात घेऊन पोस्टमार्टमसाठी पाठवले आहेत. अपघातात बसचा चालक देखील जखमी झाला आहे.

दुसऱ्या प्रत्यक्षदर्शीच्या डोळ्यासमोरच बस उलटली. या प्रत्यक्षदर्शीच्या जबाबावरून पोलिसांनी तक्रार नोंदवली आहे. अपघातातील जखमी बस चालकावर रुग्णलयात उपचार सुरु आहेत. या अपघातात चालक दोषी आढळल्यास त्याच्यावरही कारवाई होण्याची शक्यता व्यक्त केली जात आहे.