CBI ने पंजाब पोलीस दलातील डीआयजी हरचरण सिंग भुल्लर यांच्यावर मोठी कारवाई केली आहे. लाचखोरीच्या आरोपांखाली भुल्लर यांना अटक केल्यानंतर पंजाब आणि चंदीगडमध्ये विविध ठिकाणी सीबीआयने छापे टाकले. या कारवाईदरम्यान त्यांच्या घरातून मोठ्या प्रमाणात रोख रक्कम आणि दागिने जप्त करण्यात आले. तक्रारदाराविरुद्ध दाखल केलेला एफआयआर नष्ट करणे आणि पुढील पोलिस कारवाई होऊ नये यासाठी एका व्यावसायिकाकडून त्यांच्या सहकाऱ्यामार्फत लाच मागताना आणि स्वीकारताना डीआयजी हरचरण सिंग भुल्लर यांना पकडण्यात आले.

केंद्रीय अन्वेषण विभागाने (सीबीआय) केलेल्या कारवाईदरम्यान, भुल्लर यांच्या छत्तीसगडमधील निवासस्थानातून मोठ्या प्रमाणात रोख रक्कम आणि दागिने जप्त करण्यात आले. यात ७.५ कोटी रुपयांची रोकड, अंदाजे २.५ किलो सोन्याचे दागिने आणि ब्रँडेड रोलेक्स, राडो घड्याळांसह २६ आलिशान घड्याळे यांचा समावेश आहे.

भुल्लर यांच्या कुटुंबातील सदस्यांच्या अनेक बँक खात्यांची कागदपत्रे, लॉकरच्या चाव्या आणि संशयित बेनामी संस्थांशी संबंधित कागदपत्रे देखील जप्त करण्यात आली. तसेच समराळा येथील त्यांच्या फार्महाऊसमधून चार बंदुका आणि १०० काडतुसे जप्त करण्यात आली. सीबीआयला छाप्यात १०८ दारूच्या बाटल्या, ५.७ लाख रुपये रोख आणि १७ काडतुसे सापडल्याचे म्हटले जात आहे. मध्यस्थी करणाऱ्याच्या घरातून २१ लाख रुपये रोख जप्त करण्यात आले आहे.

११ ऑक्टोबर रोजी पंजाब पोलीस दलातील डीआयजी हरचरण सिंग भुल्लर यांच्या विरुद्ध चंदीगड सीबीआय कार्यालयात तक्रार दाखल करण्यात आली. भुल्लर मला धमकावत होते, पैशांची मागणी करत होते, असे आरोप एका भंगार व्यापाऱ्याने केले होते. तक्रारीनुसार, भुल्लर यांनी त्या व्यावसायिकाच्या विरुद्ध खोटा खटला दाखल केला होता. तो खटला रद्द करण्यासाठी ८ लाख रुपये लाच मागितली होती.