महाकुंभ मेळ्यात एक धक्कादायक घटना घडली आहे. विवाहबाह्य संबंधातून पतीनं पत्नीची हत्या केली आहे. आधी महाकुंभात संगम नदीवर स्नान करायला नेलं. नंतर तीची चाकूने हत्या केली. यानंतर कुटुंबाला आणि पोलिसांना सांगितलं की, पत्नी महाकुंभाच्या गर्दीत हरवली आहे. पोलिसांनी तपास केला असता, पतीनेच पत्नीची हत्या केली असल्याचं उघड झालं. या धक्कादायक घटनेनंतर परिसरात एकच खळबळ उडाली आहे.

विवाहबाह्य संबंधातून पत्नीची हत्या

मिळालेल्या माहितीनुसार, आरोपी अशोक हा दिल्ली महानगरपालिकेत स्वच्छता कर्मचारी म्हणून कार्यरत आहे. तो दिल्लीतील त्रिलोकपुरीचा रहिवासी आहे. डीसीपी अभिषेक भारती यांनी सांगितले की, आरोपीचे विवाहबाह्य संबंध होते. आरोपी पती गेल्या ३ महिन्यांपासून त्याची पत्नी मीनाक्षीची हत्येचे कट रचत होता.

हॉटेलमध्ये आढळला महिलेचा मृतदेह

अभिषेक भारती म्हणाले की, आरोपी आणि त्याची पत्नी १८ फेब्रुवारीला प्रयागराजला गेले होते. संगमात दोघांनी स्नान केलं, नंतर न्यु झुसी परिसरात एक खोली भाड्यानं घेतली. त्यानंतर दोघांमध्ये भांडण झालं. हाच राग मनात धरून त्यानं पत्नीची चाकूने गळा चिरून हत्या केली आणि पळ काढला. बाथरूममध्ये महिलेचा मृतदेह आढळल्यानंतर झुसी पोलीस घटनास्थळी पोहोचले. त्यांनी सीसीटीव्ही फुटेज तपासले.

२१ फेब्रुवारीला मृत महिलेचा भाऊ आणि तिच्या मुलांनी पोलीस ठाण्यात तक्रार दाखल केली. कपडे आणि छायाचित्रांवरून महिलेची ओळख पटली. पोलिसांना कुटुंबातील सदस्यांकडून कळाले पतीचे विवाहबाह्य संबंध आहेत. पत्नीसोबत झालेल्या भांडणाचा राग मनात धरून त्याने पत्नीची हत्या केली असल्याचं कबुल केलं. या घटनेनंतर आरोपी पतीला अटक करण्यात आली आहे.