नवी दिल्ली : जम्मू-काश्मीरमधील पहलगाममध्ये झालेल्या दहशतवादी हल्ल्यानंतर संपूर्ण भारतात संतापाची लाट पसरली आहे. त्यातच आत्ता सर्वात मोठी बातमी समोर आली आहे. देशाचे पंतप्रधान नरेंद्र मोदी यांच्या दिल्लीतील निवासस्थानी महत्त्वाची बैठक पार पडत असल्याची माहिती समोर येत आहे. पंतप्रधान नरेंद्र मोदी यांच्या अध्यक्षतेखाली तीनही सैन्य दलाच्या प्रमुखांसोबत बैठक पार पडत आहे. याचदरम्यान, अजून एक मोठी बातमी समोर आली आहे. ती म्हणजे, सैन्यदलाच्या क्षमतेवर आपल्याला पूर्ण विश्वास आहे, त्यामुळे त्यांनी दिवस, वेळ अन् टार्गेट निवडावे आणि कारवाई करावी अशी सूचना पंतप्रधान नरेंद्र मोदी यांनी दिल्याची माहिती आहे. पहलगाम हल्ल्याचा आपल्याला बदला घ्यायचा आहे, दहशतवाद्यांना सडेतोड उत्तर द्या असंही पंतप्रधानांनी सैन्याच्या तीनही दलांना सांगितलं आहे.

पहलगाम हल्ल्यानंतर सातत्याने वरिष्ठ पातळीवरच्या बैठका घडताना दिसत आहेत. संरक्षण मंत्री राजनाथ सिंह हे गेल्या दोन दिवसांपासून सातत्याने पंतप्रधान मोदींची भेट घेताना दिसत आहेत. पाकिस्तानमध्ये सध्या अनेक घडामोडी घडत आहेत. पाकिस्तानात तीन दिवसांसाठी हवाई क्षेत्रावर देखील बंदी घालण्यात आली आहे. तसेच पाकिस्तान सैन्याने सीमेवर रणगाडे देखील आणले आहेत. पाकिस्तानात सुरु असलेल्या या हालचालींकडे भारतीय सैन्याचं अतिशय बारकाईनं लक्ष आहे. भारतीय सैन्याकडूनही पाकिस्तानला चोख प्रत्युत्तर देण्यासाठी सीमेवर चोख तयारी करण्यात आली आहे.

पंतप्रधान नरेंद्र मोदींच्या अध्यक्षतेखाली आगामी काळात चार महत्त्वाच्या बैठकी होणार आहेत. भारताच्या सुरक्षेसंबंधित या महत्त्वाच्या बैठका असणार आहेत. यापैकी उद्या सकाळी ११ वाजता होणारी बैठक ही अत्यंत महत्त्वाची आहे. कॅबिनेट कमिटी ऑफ सेक्युरिटी म्हणजेच सीसीएसची बैठक उद्या सकाळी ११ वाजता आयोजित करण्यात आली आहे. भारताच्या सुरक्षेसंबंधित निर्णय घेण्याबाबत ही अत्यंत उच्चस्तरीय समिती आहे. या समितीची उद्या बैठक आयोजित करण्यात आली आहे. त्याआधी पंतप्रधान मोदींनी तीनही दलांच्या प्रमुखांसोबत बैठक बोलावण्यात आली होती.