अमेरिकेत विमान अपघाताचे सत्र सुरूच आहे. अमेरिकेतील फिलाडेल्फियामधील एका शॉपिंग मॉलजवळ शनिवारी पहाटे विमान कोसळले. मिडिया रिपोर्टनुसार, या विमान अपघातात ६ जणांचा मृत्यू झाल्याची माहिती आहे. अपघाताच्या वेळी विमानात किमान दोन प्रवासी होते. हा धक्कादायक अपघात ईशान्य फिलाडेल्फियामध्ये रोझवेल्ट मॉलजवळ घडला आहे. या परिसरात आगीचे लोट पाहायला मिळत असून, या घटनेनंतर परिसरात एकच खळबळ उडाली आहे.

सीबीएस न्यूजनं दिलेल्या माहितीनुसार, अपघातावेळी विमानात दोन जण होते. हे विमान ईशान्य फिलाडेल्फिया विमानतळावरून उड्डाण केल्यानंतर मिसूरी येथील स्प्रिंगफील्ड - ब्रॅन्सन राष्ट्रीय विमानतळाकडे जात होते. सायंकाळी साडेसहाच्या सुमारास हा अपघात घडल्याची माहिती आहे. हे विमान मॉलच्या परिसरात क्रॅश झालं. त्यानंतर आगीनं रौद्ररूप धारण केलं. परिसरात आगीचे लोट आणि नागरीकांमध्ये भीती पाहायला मिळाली.

मिडिया रिपोर्टनुसार, विमान पेनसिल्व्हेनियाच्या फिलाडेल्फिया येथील रोझवेल्ट मॉलच्या बाहेर कोसळले. क्रॅश झालेले विमान हे वैद्यकीय विमान लिअरजेट ५५ होते. जे फिलाडेल्फिया ते स्प्रिंगफील्ड, मिसूरी येथे उड्डाण करत होते. विमानात किती लोक होते आणि मृतांची अधिकृत माहिती समोर येणं बाकी आहे. या प्रकरणी FAA आणि नॅशनल ट्रान्सपोर्टेन सेफ्टी बोर्ड NTSBच्या नेतृत्वाखाली घटनांची चौकशी करीत आहेत.

यासंदर्भात पेनसिल्व्हेनियाचे गव्हर्नर जोश शापिरो सांगतात, मी फिलाडेल्फियाच्या महापौरांशी बोललो आहे. माझी टीम सर्व जबाबदार एजन्सींच्या संपर्कात आहे. ईशान्य फिली येथील खाजगी विमान अपघाताच्या मदतीसाठी आम्ही कोणत्याही प्रकारे मदत करण्यास तयार आहोत. असं ट्विट करत त्यांनी माहिती दिली.