Petrol-Diesel Prices: पेट्रोल-डिझेलचे वाढलेले दर सर्वसामन्यांसाठी डोकेदुखी ठरत आहे. इंधनाच्या वाढलेल्या किमतीचा परिणाम इतर वस्तूंवरही होतो. मात्र येत्या काळात पेट्रोल-डिझेलच्या किमतीत घट होण्याची शक्यता आहे. कारण केंद्रीय पेट्रोलियम मंत्री हरदीप सिंग पुरी यांनी तेल कंपन्यांना इंधनाचे दर कमी करण्याचे आवाहन केले आहे. तसेच त्यांनी व्हॅट कमी न करणाऱ्या राज्य सरकारांवरही निशाणा साधला.

आंतरराष्ट्रीय किमतीत वाढ होऊनही, आम्ही तेलाच्या किमती मॅनेज करू शकतो, कारण केंद्राने नोव्हेंबर 2021 आणि मे 2022 मध्ये उत्पादन शुल्क कमी केले होते, असं हरदीपसिंग पुरी यांनी म्हटलं. (Latest Marathi News)

काही राज्य सरकारांनी तरीही व्हॅट कमी केला नाही आणि तिथे तेलाच्या किमती चढ्या आहेत. हरदीप सिंग पुरी म्हणाले की, मी तेल कंपन्यांना विनंती करतो की जर आंतरराष्ट्रीय तेलाच्या किमती नियंत्रणात असतील आणि त्यांच्या कंपन्यांची अंडर-रिकव्हरी थांबली असेल तर भारतातील तेलाच्या किमती कमी कराव्यात.

केंद्रीय पेट्रोलियम मंत्री हरदीप सिंह पुरी रविवारी उत्तर प्रदेशातील वाराणसी येथे एका कार्यक्रमात उपस्थित होते. तिथे त्यांनी म्हटलं की, भारत हा जगातील तिसरा सर्वात मोठा ऊर्जा ग्राहक आहे. त्यांनी यावर भर दिला की भारत देशांतर्गत ऑईल आणि गॅसच्या शोधाचा पाठपुरावा करत आहे. पर्यायी ऊर्जा स्त्रोतांकडे संक्रमण करत आहे आणि ऊर्जा सुरक्षिततेचा मार्ग म्हणून गॅस आणि ग्रीन हायड्रोजनचा वापर करत आहे.