दिल्ली, ता. ३ जुलै २०२४

लोकसभा निवडणुकांतर होत असलेल्या पहिल्या अधिवेशनाचा आज शेवटचा दिवस. काल लोकसभेत विरोधकांवर निशाणा साधल्यानंतर आज राज्यसभेतही पंतप्रधान मोदींनी विरोधकांवर जोरदार हल्लाबोल केला. राष्ट्रपतींच्या अभिभाषणावर बोलताना त्यांनी संविधान हीच मोठी प्रेरणा असल्याचे सांगत विरोधकांवर तोफ डागली.

काय म्हणाले पंतप्रधान नरेंद्र मोदी?

"भारताच्या संसदीय लोकशाहीत अनेक दशकांनंतर जनतेने सलग तिसऱ्यांदा सेवा करण्याची संधी दिली. 10 वर्षे सत्तेत राहून पुन्हा सरकार येण्याचा योग 60 वर्षांनंतर आला आहे. ही काही सामान्य गोष्ट नाही. जनतेने दिलेल्या या निर्णयाला काही लोकांनी जाणीवपूर्वक कलंकित करण्याचा प्रयत्न केला," असा टोला पंतप्रधान मोदी यांनी लगावला.

तसेच "मला काही काँग्रेस सहकाऱ्यांचे मनापासून आभार मानायचे आहेत. निकाल आल्यापासून आमचे सहकारी एक तृतीयांश सरकार स्थापन होईल, असे वारंवार सांगत होते. आम्हाला 10 वर्षे उलटून गेली आणि अजून 20 बाकी आहेत, यापेक्षा मोठे सत्य काय असू शकते. एक तृतीयांश झाले. अजून दोन तृतीयांश बाकी आहेत," असे पंतप्रधान मोदी म्हणाले.

दरम्यान, राज्यसभेत पंतप्रधान मोदी यांचे भाषण सुरू असताना विरोधकांनी जोरदार घोषणाबाजी करत सभात्याग केला. यावरुनही पंतप्रधान मोदींनी आपल्या भाषणातून टीका केली. मैदान सोडणेच त्यांच्या नशिबात आहे. या लोकांना सत्य पचवता येत नाही. याच कारणामुळे ते मैदान सोडून पळून जात आहेत. मी माझ्या कर्तव्याशी संलग्न आहे. मला प्रत्येक क्षणाचा हिशोब देशवासियांना द्यायचा आहे.