जम्मू आणि काश्मीरमधील पहलगाम येथे पर्यटकांवर झालेल्या दहशतवादी हल्ला झाल्याची घटना घडलीय. पंतप्रधान नरेंद्र मोदींनी या दहशतवादी हल्ल्याची दखल घेतलीय. मोदी सौदी अरेबियाच्या दोन दिवशीय दौऱ्यावर आहेत. दहशतवादी हल्ला झाल्याची माहिती मिळताच पंतप्रधान नरेंद्र मोदी यांनी केंद्रीय गृहमंत्री अमित शहा यांच्याशी फोनवरून संवाद साधलाय. या प्रकरणात ठोस आणि कठोर कारवाई करण्यास आदेश त्यांनी दिलेत.

पंतप्रधानांनी गृहमंत्र्यांना घटनास्थळी जाण्याच्या सुचना दिल्या आहेत. दरम्यान, अमित शहा यांनी नवी दिल्लीत एक उच्चस्तरीय बैठक घेतली. या बैठकीला उपराज्यपाल मनोज सिन्हा, मुख्यमंत्री ओमर अब्दुल्ला, सीआरपीएफचे महासंचालक, जम्मू आणि काश्मीरचे महासंचालक आणि लष्कराचे अधिकारी व्हिडिओ कॉन्फरन्सिंगद्वारे उपस्थित होते.

बैठकीनंतर शहा यांनी प्रतिक्रिया देताना सांगितले की, दहशतवाद्यांना कोणत्याही किंमतीत सोडले जाणार नाही. अमित शहा बीएसएफच्या खास हेलिकॉप्टरने श्रीनगरला रवाना झालेत. त्यांच्यासोबत आयबी प्रमुख आणि गृहसचिव देखील आले आहेत. तिथे पोहोचल्यानंतर, गृहमंत्री एक उच्चस्तरीय बैठक घेतील.या बैठकीत मुख्यमंत्री अब्दुल्ला आणि उच्च सुरक्षा अधिकारी देखील सहभागी होतील.