पहलगाम हल्ल्यात निष्पाप पर्यटकांचा जीव घेणाऱ्या दहशतवाद्यांना शोधण्यासाठी सुरक्षा दलांचे जवान संपूर्ण काश्मीर पिंजून काढत आहे. शोधमोहीम तीव्र करण्यात आली आहे. एनआयएकडून चौकशी सुरू आहे. दुसरीकडं या हल्ल्यामागे पाकिस्तानचा हात असल्याचा संशय आहे. त्यामुळं भारतानं पाकिस्तानचा श्वास समजला जाणारा सिंधु पाणी करार स्थगित करून त्यांचं नाक बंद केलं आहे. अशातच आता पहलगाममधील घटनास्थळाचा आणखी एक व्हिडिओ सोशल मीडियावर व्हायरल झाला आहे.

निर्दयी आणि क्रूर दहशतवाद्यांकडून दूर-दूरपर्यंत असलेल्या पर्यटकांवर बेछूट गोळीबार करण्यात येत आहे. त्यानंतर पर्यटक आपला जीव वाचवण्यासाठी जिथे आसरा मिळेल, त्या ठिकाणी लपून बसण्याचा प्रयत्न करत असल्याचे या व्हिडिओत दिसत आहे.

व्हिडिओमध्ये नेमकं काय?

पहलगाम हल्ल्याचा आणखी एक व्हिडिओ समोर आला आहे. पठारासारखा भाग आहे. तिथे पर्यटक निसर्गाचा मनसोक्त आनंद घेत असतानाच दहशतवादी घुसले. त्यांनी अंदाधुंद गोळीबार केल्याचे या व्हिडिओत दिसत आहे. दहशतवाद्यांनी गोळीबार सुरू केला, त्यावेळी काही अंतरावर पर्यटक जीवाच्या आकांताने ओरडत आहेत. स्वतःला वाचवण्यासाठी प्रत्येक जण मिळेल ती जागा शोधत आहे. चेहऱ्यावरील आनंदाची जागा भीतीनं घेतली आहे.

गोळीबारामुळं प्रचंड गोंधळ

दहशतवाद्यांनी तुफान गोळीबार सुरू केल्यानंतर मोठा गोंधळ उडाला होता. क्रूर दहशतवादी खुलेआम गोळीबार करत आहेत. ज्या ठिकाणी पर्यटक स्वतःचा जीव वाचवण्यासाठी लपून बसले आहेत, त्या दिशेने दहशतवादी जात असताना या व्हिडिओत दिसून येत आहेत.

अनेक पर्यटक तेथील एका कपड्याच्या स्टॉलच्या पाठीमागे लपून बसले आहेत. त्यात घोडेवाले आणि स्थानिक नागरिक देखील आहेत. घोडेवाले तिथेच थांबले आहेत. ते देखील पर्यटकांसोबतच होते. तेथील घोडेवाले पर्यटकांना धीर देण्याचा प्रयत्न करताना या व्हिडिओत दिसून येत आहेत.

किंचाळ्या आणि गोळीबाराचा आवाज

या व्हिडिओत एक सपाट भाग दिसत आहे. मधेच एक खोलगट भाग आहे. एकीकडे गोळीबाराचा आवाज आणि दुसरीकडे पर्यटकांच्या किंचाळ्यांचा आवाज येत आहे. गोळीबाराचा आवाज थांबता थांबत नसल्याचे या व्हिडिओतून दिसून येते. दहशतवादी निर्दयीपणे पर्यटकांवर गोळ्या झाडताना दिसत आहेत.