नोएडामधून एक धक्कादायक बातमी समोर येत आहे. पोलिसांनी एका टोळीचा पर्दाफाश केला आहे. ही टोळी बॉडी मसाजच्या नावाखाली मुलींचे आक्षेपार्ह स्थितीतील फोटो काढून व्हायरल करण्याची धमकी देत पैसे उकळत होते. पोलिसांना याची माहिती मिळाल्यानंतर त्यांनी तीन जणांना अटक केली आहे. सध्या या प्रकरणातील एक महिला फरार असल्याची माहिती समोर आली आहे. पोलिसांनी आरोपींकडून ५ मोबाईल जप्त केले असून, पुढील तपास पोलिसांकडून सुरू आहे.

डीसीपी सेंट्रल नोएडा शक्ती मोहन अवस्थी म्हणाले की, अलीकडेच २ तरूणींनी बॉडी मसाजच्या नावाखाली फसवणूक झाल्याची तक्रार केली होती. ही टोळी मसाज करताना मुलींचे आक्षेपार्ह फोटो काढत असे. नंतर व्हायरल करण्याची धमकी देतात. धमकी देऊन ही टोळी मुलींकडून १५ ते २० हजार रूपयांची मागणी करतात. ही बाब समोर आल्यानंतर पोलीस ठाण्याच्या प्रभारी यांच्या नेतृत्वाखाली एक पथक तयार करण्यात आले.

रविवारी पथकाने कसून चौकशी करून आग्रा येथील रहिवासी शिवम शर्मा, रोहित कुमार आणि हरियाणातील रहिवाली राजन उर्फ राजू या आरोपींनी अटक केली. दरम्यान, त्यांच्या टोळीतील एक महिला फरार असल्याची माहिती आहे.

नेमकं प्रकरण काय?

आरोपींनी आधी जस्ट डायलवर बिझनेस प्रोफाईल तयार केले. मसाजसाठी बुकिंग मिळताच, आरोपी मुलींना सांगितलेल्या ठिकाणी पाठवत असे. नंतर ही टोळी ग्राहकाचे मसाज करून त्यांचे आक्षेपार्ह फोटो काढत असे. फोटो काढल्यानंतर ही टोळी ग्राहकांना ब्लॅकमेल करण्याची धमकी देत त्यांच्याकडून १५ ते २० हजार रूपये उकळत असे. पोलिसांनी तपास करून आरोपींकडून पैसे आणि ५ मोबाईल फोन जप्त केले आहेत.

७५ लोकांची फसवणूक

चौकशीदरम्यान, आरोपींनी आतापर्यंत सुमारे ७५ लोकांना धमकी देऊन पैसे उकळल्याचे उघड झाले आहे. शिवम आणि रोहित आधीपासून मित्र होते. दोघांनी राजनला आपल्या गटात सामील केले. तसेच यात एका महिलेचाही समावेश आहे. महिला सध्या फरार असून, पोलिसांनी तिला वॉन्टेड घोषित केले आहे.