पंजाबच्या राजकारणात मोठा उलटफेर पाहायला मिळण्याची शक्यता आहे. काँग्रेसपासून दूर होत चाललेले नवजोत सिंह सिद्धू लवकरच भाजपमध्ये प्रवेश करण्याची शक्यता व्यक्त केली जात आहे. त्यांची पत्नी आणि माजी आमदार डॉ. नवजोत कौर सिद्धू यांच्या वक्तव्याने राजकीय वर्तुळात चर्चांना उधाण आलं आहे.

काही दिवसांपूर्वी काँग्रेसने डॉ. नवजोत कौर सिद्धू यांना निलंबित केलं. पक्षविरोधी वक्तव्ये केल्याने पक्षातून निलंबित करण्यात आल्याचे सांगण्यात येत आहे. परंतु नवजोत कौर यांनी काँग्रेस पक्ष सोडण्याची घोषणा केली आहे.

काँग्रेस पक्ष सोडल्यानंतर नवजोत कौर सिद्धू यांनी थेट काँग्रेसचे वरिष्ठ नेते राहुल गांधी यांच्यावर निशाणा साधला. राहुल गांधी यांना पप्पू म्हणत टीका देखील केली. काँग्रेसचा मुख्यमंत्री होण्यासाठी ५०० कोटी रुपयांची सुटकेस द्यावी लागते, अशी टीका त्यांनी केली. या टीकेनंतर काँग्रेसने नवजोत कौर यांना निलंबित केल्याचे समजतेय.

नवजोत सिंह सिद्धू लवकरच भाजपमध्ये प्रवेश करण्याची शक्यता असल्याची राजकीय वर्तुळात चर्चा सुरू आहे. सिद्धू हे याआधी देखील भाजपमध्ये होते. ते भाजपकडून अमृतसरचे खासदार होते. कालांतराने सिद्धू यांनी काँग्रेसमध्ये प्रवेश केला. ते पंजाब काँग्रेसचे अध्यक्ष देखील होते.

नवजोत सिंह सिद्धू भाजपमध्ये प्रवेश करणार, या चर्चांना अद्याप भाजपच्या नेत्यांनी कोणताही दुजोरा दिलेला नाही. नवजोत कौर यांच्या वक्तव्यावरून स्पष्ट दिसत आहे की, त्यांच्या कुटुबीय काँग्रेसपासून दूर गेलं आहे. सिद्धू यांनी भाजपमध्ये प्रवेश केल्यास काँग्रेसला मोठा धक्का मानला जाईल. या पक्षप्रवेशामुळे भाजपला पंजाबमध्ये मोठा चेहरा मिळण्याची शक्यता आहे.