मध्य प्रदेशातील मोरेना येथे रेल्वे गाडीचा मोठा अपघात घडला आहे. 'उदयपूर इंटरसिटी एक्सप्रेस'मध्ये आग लागल्याची अफवा उडाली त्यानंतर प्रवाशांनी खाली उड्या मारल्या. त्याचवेळी शेजारच्या रुळावरून येणाऱ्या 'पातालकोट एक्सप्रेस' खाली चिरडून अनेक प्रवासी बळी ठरले. या दुर्घटनेत सुमारे सहा जणांचा मृत्यू झाला आहे. ही घटना मोरेना येथील हेतांपूर स्थानकावर घडल्याचे समजते आणि सध्या घटनास्थळी मदत व बचावकार्य सुरू आहे.

मिळालेल्या माहितीनुसार, हा अपघात मोरेना येथील हेतामपूर स्थानकाजवळ घडला. उदयपूर इंटरसिटी एक्सप्रेस रविवारी (१४ जून) दुपारी ४ वाजता मोरेनाहून धोलपूरच्या दिशेने निघाली होती. हेतामपूर स्थानकावर गाडीला आग लागल्याची अफवा पसरली.

आगीची बातमी समजताच प्रवाशांमध्ये भीती पसरली त्यामुळे जीव वाचवण्यासाठी आणि भीतीपोटी अनेकांनी धावत्या गाडीतून खाली उड्या मारल्या आणि त्याच वेळी दुसऱ्या एका एक्स्प्रेसच्या खाली येत प्रवाशांचा मृत्यू झाला. अपघाताची बातमी मिळताच पोलीस आणि रेल्वे प्रशासनाचे अधिकारी घटनास्थळी पोहोचले. आतापर्यंत तीन महिला आणि एका मुलाचे मृतदेह बाहेर काढण्यात आले आहेत.

या दुर्घटनेत तीन महिला आणि एका मुलासह एकूण चार जणांचा मृत्यू झाला. घटनेची माहिती मिळताच आरपीएफचे (RPF) पथक घटनास्थळी दाखल झाले. आग लागल्याच्या अफवांमुळे प्रवासी रेल्वे रुळांवर उतरले होते. पण त्याचवेळी शेजारच्या रुळावरून वेगाने येणाऱ्या पातालकोट एक्सप्रेसची (गाडी क्रमांक २०४२४) धडक बसल्याने चार जणांचा जागीच मृत्यू झाला. या अपघातानंतर परिसरात एकच खळबळ उडाली. मृतांमध्ये आफरीन (३५), अशद (४), शकुंतला (६०) आणि वीरमा देवी (५८) यांचा समावेश आहे.