काँग्रेसचे नगरसेवक सद्दाम यांनी रात्री सव्वा एकच्या सुमारास गळफास घेऊन आत्महत्या केल्याची घटना उत्तरप्रदेशच्या मुरादाबाद येथे घडली. त्यांच्या मृत्यूचे कारण अद्याप स्पष्ट झालेले नाही. मात्र, स्थानिकांमध्ये त्यांच्या पत्नीशी झालेल्या वादानंतर त्यांनी हे पाऊल उचलल्याची चर्चा आहे. रात्री नगरसेवकाने गळफास घेतल्याची माहिती काँग्रेस नेत्यांना मिळताच तयांच्या घरी मोठी गर्दी जमा झाली. तरुण नगरसेवकाच्या मृत्यूची बातमी पसरताच परिसरात मोठी खळबळ उडाली.

सद्दाम हे मूळचे अमरोहा येथील रहिवासी असून ते अनेक वर्षांपासून मुरादाबादमध्ये राहत होते. मिळालेल्या महितीनुसार, रात्री एक वाजता त्यांनी गळफास घेऊन आत्महत्या केली. स्थानिकांच्या म्हणण्यांनुसार, त्यांचा पत्नीशी वाद झाला होता. तसेच टोकाचे पाऊल उचलण्यापूर्वी त्यांनी पत्नीला व्हिडिओ कॉल करून निरोप दिल्याचीही चर्चा आहे.

नगरसेवकाच्या मृत्यूची माहिती मिळताच काँग्रेसचे ज्येष्ठ नेते आणि माजी आमदार हाजी इकराम कुरेशी त्यांच्या घरी पोहोचले. त्यांनी कुटुंबीयांची भेट घेऊन त्यांचे सांत्वन केले. काँग्रेसचे महानगराध्यक्ष जुनैद इकराम उर्फ बंटी यांनीही घटनास्थळी पोहोचून कुटुंबीयांची भेट घेतली. दरम्यान, एसपी सिटी कुमार रणविजय सिंह यांनी सांगितले की, कुटुंबीयांकडून अद्याप कोणतीही अधिकृत माहिती देण्यात आलेली नाही. फोनवरून काँग्रेस नगरसेवकाने गळफास घेऊन आत्महत्या केल्याची माहिती मिळाली आहे. या प्रकरणाचा तपास सुरू आहे.