गेल्या 12 दिवसांपासून आखातात सुरु असलेल्या युद्धाचे परिणाम आता जगात दिसायला सुरुवात झालीये. एकीकडे अमेरिका इराणला गुडघ्यावर आणल्याचे लाख दावे करत असली तरी शेवटचा सैनिक असेपर्यंत शस्त्र खाली ठेवणार नाही असा निर्धार केलेल्या इराणनं आता युद्ध थांबवायचं असेल तर एक फॉर्म्युला ठेवलाय. युद्ध थांबवायचं असेल तर 3 अटी मान्य करण्याचा अल्टीमेटम इराणनं दिला. जगात पुन्हा शांतता प्रस्थापित करण्यासाठी या अटी नेमक्या कोणत्या आहेत पाहा.

इराणच्या सार्वभौमत्वाला, कायदेशीर हक्कांना विशेषतः अणू ऊर्जा आणि संरक्षण अधिकारांना मान्यता मिळावी तसंच या युद्धात अमेरिका आणि इस्रायलच्या हल्ल्यांमुळे जे काही नुकसान झालं, त्याची पूर्ण भरपाई देण्यात यावी. तर भविष्यात इराणवर पुन्हा कधीही लष्करी आक्रमण करणार नाही, याची लेखी आणि ठाम आंतरराष्ट्रीय हमी देण्यात यावी.

इराणचे राष्ट्राध्यक्ष मसूद पेझेश्कियान यांनी या अटी जागतिक व्यासपीठासमोर मांडून आता चेंडू थेट व्हाईट हाऊसच्या कोर्टात टोलवलाय. आता निर्णय अमेरिका आणि इस्रायलला घ्यायचा आहे. १२ दिवस उलटलेत, हजारो निष्पापांचा बळी गेलाय आणि लाखो कुटुंबं उद्ध्वस्त झालीत. जागतिक अर्थव्यवस्थेचा कणाही या युद्धानं मोडलाय. त्यामुळे आता जगाची भावना एकच आहे, युद्ध थांबवा. पण अमेरिकेला इराणच्या या अटी मान्य होतील का? की अहंकारामुळे आखातातील हे युद्ध जागतिक महायुद्धाच्या दिशेनं वळतं याकडे संपूर्ण जगाचं लक्ष लागलंय."