महाराष्ट्र आणि पश्चिम बंगालनंतर मेघालयातील एक पक्ष फुटलाय. या पक्षातील काही आमदार भाजपमध्ये गेलेत, तर काही आमदार सत्ताधारी पक्षात गेले असून विधानसभेचे अध्यक्ष थॉमस ए. संगमा यांनी याला मंजुरीही दिलीय. युनायटेड डेमोक्रॅटिक पार्टीच्या (UDP) तीन आमदारांनी सत्ताधारी नॅशनल पीपल्स पार्टीमध्ये दाखल झाले असून या विलीनीकरणाला विधानसभा अध्यक्षांनी मान्यता दिलीय. याआधी काही दिवसांपूर्वीच UDP चे आठ इतर आमदार भाजपमध्ये सामील झाले होते, ज्यामुळे आता विधानसभेत UDP चा केवळ एकच आमदार उरलाय.

आमदाराच्या विलीनीकरणाला मान्यता देताना अध्यक्ष म्हणाले की, त्यांनी भारतीय राज्यघटनेच्या दहाव्या अनुसूचीतील परिच्छेद ४ अंतर्गत, 'नॅशनल पीपल्स पार्टी' (NPP) मध्ये त्यांच्या विलीनीकरणाला मान्यता दिलीय. त्यांना मेघालय विधानसभेत या ३ आमदारांना 'नॅशनल पीपल्स पार्टी'चे सदस्य म्हणून जागा देण्यात येणार आहे.

१७ ऑक्टोबर रोजी या तिन्ही व्यक्तींनी विधानसभा अध्यक्षांना पत्र लिहून कळवले की, त्यांनी एनपीपी (NPP) मध्ये विलीन होण्याचा निर्णय घेतलाय. त्यांनी असेही नमूद केलय की, विधानसभेतील यूडीपी विधिमंडळ पक्षाच्या एकूण सदस्यसंख्येच्या किमान दोन-तृतीयांश सदस्य ते आहेत.

विधानसभेच्या अध्यक्षानुसार, अध्यक्षांनी तिघांनाही त्यांच्या पत्रातील मजकुराची स्वतः खात्री करण्यास सांगितले होते. १९ ऑक्टोबर रोजी, त्यांनी अध्यक्षांसमोर उपस्थित राहून आपल्या पत्राची पुष्टी केली आणि विलीनीकरणाचा आपला निर्णय पुन्हा एकदा स्पष्ट केलाय. विधानसभा अध्यक्ष म्हणालेत की, "त्यांनी स्वेच्छेने आणि स्वतःच्या मर्जीने 'नॅशनल पीपल्स पार्टी'मध्ये विलीन होण्याचा निर्णय घेतला. याबद्दल मी समाधानी आहे."

ही नवीन घडामोड १६ ऑक्टोबर रोजी दिलेल्या एका आदेशानंतर घडलीय. याद्वारे युडीपीच्या (UDP) आठ आमदारांचे भाजपमध्ये झालेले विलीनीकरण अधिकृतपणे मान्य करण्यात आले होते. या दोन्ही विलीनीकरणांना मान्यता मिळाल्यामुळे मेघालय विधानसभेच्या ६० सदस्यांच्या सभागृहात युडीपीच्या आमदारांची संख्या १२ वरून थेट एकावर आलीय.