लखनऊ : मर्चंट नेव्हीचा माजी कर्मचारी सौरभ राजपूतच्या निर्घृण हत्येनं संपूर्ण देश हादरला. मुलीचा वाढदिवस साजरा करण्यासाठी लंडनहून मेरठला आलेल्या सौरभची हत्या त्याची पत्नी मुस्कान रस्तोगी आणि तिचा प्रियकर साहिल शुक्लाने केली. हत्येनंतर त्याच्या मृतदेहाचे तुकडे करण्यात आले. ते एका प्लास्टिकच्या ड्रममध्ये टाकून तो ड्रम सिमेंटनं भरुन टाकण्यात आला. त्यानंतर ड्रम घरातच लपवण्यात आला. सौरभचा मृतदेह, त्याची छिन्नविच्छिन्न अवस्था पाहून डॉक्टरांच्या अंगावर देखील शहारे आले.

सौरभ राजपूतचा शवविच्छेदन अहवाल समोर आला आहे. सौरभसोबत झालेला प्रकार अतिशय भयंकर आहे. चाकूचे तीन वार त्याच्या हृदयापर्यंत पोहोचले. त्यामुळे त्याच्या हृदयाला गंभीर इजा झाली. मी आजपर्यंत कधीही अशा प्रकारचा मृतदेह पाहिलेला नाही, अशा प्रकारच्या मृतदेहाचं शवविच्छेदन केलेलं नाही, अशा शब्दांत डॉक्टर अशोक कटारिया यांनी मृतदेहाच्या स्थितीची माहिती दिली.

सौरभची हत्या २ आठवड्यांपूर्वी झाल्याचं शवविच्छेदनातून स्पष्ट झालं आहे. त्याचा मृतदेह जाळण्याचा प्रयत्न झाला. मृतदेहाची त्वचा लोंबकळत होती आणि सगळे दात हलत होते. मी माझ्या ३० वर्षांच्या वैद्यकीय कारकिर्दीत अशी केस पाहिली नव्हती, असं डॉ. कटारिया म्हणाले. मेरठ वैद्यकीय महाविद्यालयाच्या शवविच्छेदनगृहात दरवर्षी १५०० ते १८०० मृतदेहांचे शवविच्छेदन होतं. यातील ७०० ते ८०० शवविच्छेदनांमध्ये मी स्वत: लक्ष घालतो. शवविच्छेदन प्रक्रियेत सहभागी होतो. पण सौरभसारखी केस मी आजवर पाहिलेली नाही. त्याच्या मृतदेहाची स्थिती भयंकर होती, असं डॉक्टरांनी सांगितलं.