पूर्व चीनमधील शेडोंगमध्ये किंगदाओ येथील बेहाई शिपयार्डमध्ये देखभालीसाठी उभ्या असलेल्या एका विदेशी ध्वजाच्या मालवाहू जहाजाला गुरुवारी सकाळी भीषण आग लागली. या दुर्घटनेत मोठी जीवितहानी आणि मोठे आर्थिक नुकसान झाल्याची माहिती समोर आली आहे. मात्र, मृतांचा नेमका आकडा 20 सांगितला जात असून आगीचे कारण अद्याप अधिकृतपणे स्पष्ट करण्यात आलेले नाही.

किंगदाओ येथील ‘बेहाई शिपबिल्डिंग कंपनी लिमिटेड’च्या बंदरात देखभालीसाठी हे विदेशी मालवाहू जहाज उभे होते. गुरुवारी सकाळी सुमारे 11 वाजून 15 मिनिटांनी (भारतीय वेळेनुसार सकाळी 8.45 वाजता) जहाजाला अचानक भीषण आग लागली. आग लागल्यानंतर परिसरात मोठी खळबळ उडाली असून, बचाव आणि मदतकार्य सुरू करण्यात आले आहे.

चीनची सरकारी वृत्तसंस्था शिन्हुआने दिलेल्या माहितीनुसार, या दुर्घटनेत मोठ्या प्रमाणात जीवितहानी झाल्याचे सांगण्यात आले आहे. मात्र, सध्या मृत आणि जखमींची अचूक संख्या अधिकृतपणे जाहीर करण्यात आलेली नाही. तसेच आग पूर्णपणे नियंत्रणात आली आहे की नाही, हेही स्पष्ट झालेले नाही.

शी जिनपिंग आणि ली कियांग यांचे बचावकार्याचे निर्देश

चीनचे राष्ट्राध्यक्ष शी जिनपिंग यांनी या दुर्घटनेची गंभीर दखल घेतली आहे. त्यांनी संबंधित विभागांना तातडीने शोध आणि बचावकार्य राबवण्याचे निर्देश दिले आहेत. तसेच दुर्घटनेतून गंभीर धडा घेत भविष्यातील आगीच्या घटना टाळण्यासाठी सर्व प्रकारच्या अग्निसुरक्षा धोक्यांची सखोल तपासणी करून त्यावर उपाययोजना करण्याचे आदेश दिले आहेत. चीनचे पंतप्रधान ली कियांग यांनीही दुर्घटनेत अडकलेल्या आणि बेपत्ता असलेल्या व्यक्तींचा तातडीने शोध घेण्याचे निर्देश दिले. जखमींना योग्य वैद्यकीय उपचार मिळतील, अशी ग्वाही देत कोणत्याही प्रकारच्या अशा दुर्घटना किंवा अतिरिक्त आपत्ती होऊ नयेत, यासाठी कठोर उपाययोजना करण्याचे आदेश त्यांनी अधिकाऱ्यांना दिले आहेत.