बिहार विधानसभा निवडणुकीच्या रणधुमाळीदरम्यान राष्ट्रीय जनता दलाच्या पक्षाने बंडखोरांवर मोठी कारवाई केली आहे. राष्ट्रीय जनता दलाने पक्षात बंडखोरी करणाऱ्या एकूण २७ नेत्यांची हकालपट्टी केली आहे. या कारवाईमुळे राजकारणात खळबळ उडाली आहे. राष्ट्रीय जनता दलाचे माजी उपमुख्यमंत्री तेजस्वी यादव यांनी या २७ नेत्यांना दणका दिला आहे.

राष्ट्रीय जनता दलाने कारवाई केलेल्या लोकांमध्ये आमदार, माजी आमदार आणि अनेक पदाधिकाऱ्यांचा समावेश आहे. राष्ट्रीय जनता दलाचे प्रदेशाध्यक्ष मंगनी लाल मंडल यांनी पत्र जारी केलं. पक्षाने या नेत्यांना ६ वर्षांसाठी बाहेरचा रस्ता दाखवला आहे.

महिला शाखेच्या प्रमुख रितु जायसवाल यांच्यावरही कारवई करण्यात आली आहे. त्याही अपक्ष उमेदवार म्हणून रिंगणात उभ्या राहिल्या आहेत. राष्ट्रीय जनता दलाने माजी प्रदेश अध्यक्ष रामचंद्र पूर्वे यांची सून स्मिता पूर्वा यांना तिकीट दिलं आहे. तसेच गोविंदपूरचे आमदार मोहम्मद कामरान यांचीही पक्षातून हकालपट्टी केली आहे. त्यांनी राष्ट्रीय जनता दलाचे उमेदवार, माजी आमदार कौशल यादव यांची पत्नी पूर्णिमा यादव यांच्या विरुद्ध निवडणूक लढण्याचा निर्णय घेतलाय.

जनता दल युनायटेड पक्षानेही केली कारवाई

जनता दल युनायटेड पक्षानेही १६ नेत्यांवर कारवाई केली आहे. जेडीयू पक्षाने त्यांना बाहेरचा रस्ता दाखवलाय. यात आमदार, दोन माजी मंत्र्यांसहित १६ नेत्यांचा समावेश आहे.

भागलपूर जिल्ह्यातील गोपालपूरमधील आमदार गोपाल मंडल यांचीही पक्षातून हकालपट्टी केली. मंडल यांनी काही दिवसांपूर्वी मुख्यमंत्र्यांच्या निवासस्थानासमोर आंदोलन केलं होतं. उमेदवारांच्या यादीत नाव समावेश होणार नसल्याची माहिती मिळाल्यानंतर त्यांनी आंदोलन केलं होतं.