मध्य प्रदेशचे माजी मुख्य सचिव आणि माजी राज्य निवडणूक आयुक्त आदित्य विजय सिंह यांचे निधन झाले आहे. वयाच्या ८३ व्या वर्षी त्यांनी अखेरचा श्वास घेतला. त्यांच्या निधनाची दुःखद बातमी त्यांच्या मुलाने दिली असून त्यांच्या अचानक जाण्याने राजकीय आणि प्रशासकीय क्षेत्रातून दुःख व्यक्त केले जात आहे. आदित्य विजय सिंह यांच्यावर आज अंत्यसंस्कार होणार आहेत.

आदित्य विजय सिंह यांचा जन्म २२ ऑक्टोबर १९४३ रोजी झाला होता. ते १९७० च्या तुकडीतील मध्य प्रदेश कॅडरचे IAS अधिकारी होते. आपल्या कामातील शिस्त, स्पष्ट निर्णय आणि कडकपणामुळे त्यांची वेगळी ओळख निर्माण झाली होती. अनेक वर्षांच्या सेवेत त्यांनी राज्यातील विविध महत्त्वाच्या पदांवर काम केले.

मार्च २००२ ते जानेवारी २००४ या काळात त्यांनी मध्य प्रदेशचे मुख्य सचिव म्हणून जबाबदारी सांभाळली. त्यावेळी राज्यात दिग्विजय सिंह यांच्या नेतृत्वाखाली काँग्रेसचे सरकार होते. त्यानंतर डिसेंबर २००३ मध्ये उमा भारती यांच्या नेतृत्वाखाली भाजपचे सरकार सत्तेवर आले. या सत्ताबदलाच्या काळातही त्यांनी काही काळ मुख्य सचिव म्हणून काम केले. मुख्य सचिव होण्यापूर्वी त्यांनी ग्वाल्हेर आणि भोपाळसारख्या महत्त्वाच्या शहरांमध्ये जिल्हाधिकारी म्हणून काम केले होते. तसेच केंद्र सरकारमध्ये असतानाही त्यांनी विविध जबाबदाऱ्या पार पाडल्या. मुख्य सचिव पदावरून निवृत्त झाल्यानंतर त्यांची मध्य प्रदेशच्या राज्य निवडणूक आयुक्तपदी नियुक्ती करण्यात आली होती.

दरम्यान काल त्यांचे निधन झाल्यानंतर त्यांच्या निधनाची माहिती त्यांचा मुलगा धनंजय विजय सिंह यांनी दिली. तसेच आज दुपारी ३ वाजता भोपाळमधील सुभाष नगर विश्राम घाट येथील स्मशानभूमीत त्यांच्या पार्थिवावर अंत्यसंस्कार करण्यात येणार आहेत. आदित्य विजय सिंह यांच्या निधनाने मध्य प्रदेशने अनुभवी आणि कर्तव्यदक्ष प्रशासकीय अधिकारी गमावला आहे. त्यांच्या जाण्याने राजकीय क्षेत्रावर शोककळा पसरली आहे.