मध्य प्रदेशातील राजगड जिल्ह्यातील बियोरा शहरात आज सकाळी एक धक्कादायक घटना घडली आहे. एका मद्यधुंद व्यक्तीने दिवसाढवळ्या आपल्या बायकोवर कोयत्याने हल्ला करत तिचे दोन्ही हात कापले. ही संपूर्ण घटना बाजारपेठेतील सीसीटीव्ही कॅमेऱ्यात कैद झाली आहे. या घटनेमुळे परिसरात प्रचंड खळबळ उडाली आहे.

कोळी मोहल्ल्यात राहणाऱ्या सविता शाक्यवार या कामावरून परतत असताना, ज्योती कॉन्व्हेंट शाळेजवळ अचानक तिचा नवरा तिच्या मागे आला आणि कोयत्याने तिला बेदम मारहाण करत दोन्ही हातांवर वार केले. त्यामुळे तिचे हात कापले गेल्याने ती गंभीररित्या जखमी झाली. हल्ल्याच्या वेळी उपस्थित नागरिकांनी तिच्या मदतीसाठी धाव घेतली. मात्र आरोपी नवऱ्याने त्यांच्यावरही हल्ला करण्याचा प्रयत्न केला. नागरिकांनी तत्काळ पोलिसांना माहिती दिली.

घटनेची माहिती मिळताच पोलीस नियंत्रण कक्ष ‘डायल ११२’ची टीम काही मिनिटांत घटनास्थळी दाखल झाली. त्यांनी गंभीर जखमी अवस्थेतील सविता शाक्यवार यांना बेवार येथील सिव्हिल हॉस्पिटलमध्ये दाखल केले. सध्या तिच्यावर उपचार सुरू असून तिची प्रकृती चिंताजनक असल्याचे डॉक्टरांनी सांगितले आहे. घटनास्थळी तहसीलदार आणि पोलिस स्टेशनचे प्रभारी अधिकारी पोहोचले आणि जखमी महिलेचा जबाब नोंदवला.

महिलेच्या माहितीनुसार, तिचा नवरा मागील काही महिन्यांपासून दारूच्या नशेत दररोज तिच्यावर अत्याचार करत आहे. दहा दिवसांपूर्वी त्याने आपल्या बायकोला आणि मुलांना घराबाहेर काढून दिले. सविता आणि तिची मुले मंदिरात राहत होती. सविताने सांगितले की तिचा नवरा अधूनमधून तिला हात कापण्याची धमकी देत असे आणि आज अखेर त्याने धमकी प्रत्यक्षात उतरवली. विशेष म्हणजे, तिने या संदर्भात अनेक वेळा पोलिसांकडे तक्रारी केल्या होत्या. परंतु त्यावर कोणतीही ठोस कारवाई झाली नव्हती.

या घटनेनंतर परिसरात संताप निर्माण झाला असून स्थानिक नागरिकांनी पोलिस प्रशासनाकडे आरोपीवर कठोर कारवाई करण्याची मागणी केली आहे. पोलिसांनी आरोपीच्या शोधासाठी पथक गठित केले असून परिसरातील सीसीटीव्ही फूटेजच्या आधारे तपास सुरू आहे.