दिल्लीत एकीकडे विद्यार्थ्यांच्या आंदोलनाला यश येत होत तर, दुसरीकडे शेतकऱ्यांचं वादळ त्यांच्या काही प्रमुख मागण्यांसाठी संसदेवर येऊन धडकले. अशातच आता मध्य प्रदेशात मुगाला १०० टक्के हमीभाव मिळावा यासाठी शेतकऱ्यांनी आंदोलन केलं आहे. हे आंदोलन आता तीव्र झाले आहे. मंगळवारी अनेक शेतकरी धान्याची पोती, अंथरूण-पांघरूण, स्वयंपाकाची भांडी आणि आठवडाभराचा राशन घेऊन भोपाळच्या बाहेरील भागात दाखल झाले. सावरकर सेतू परिसरात त्यांनी ठिय्या आंदोलन सुरू केले असून, आपल्या मागण्या मान्य होईपर्यंत आंदोलन सुरू ठेवण्याचा निर्धार व्यक्त केला आहे.

दरम्यान, मध्य प्रदेश सरकारनेही या प्रश्नात केंद्र सरकारने हस्तक्षेप करावा, अशी मागणी केली आहे. राज्याचे कृषी मंत्री ऐदलसिंह कंसाना यांनी केंद्रीय कृषी मंत्री शिवराजसिंह चौहान यांना पत्र पाठवून मूग खरेदी वाढवण्याची विनंती केली आहे. १४ मे ते ३ जुलै २०२६ या कालावधीत राज्यात सुमारे ८.०६ लाख मेट्रिक टन मूग उत्पादन झाले आहे. त्यामुळे मोठ्या संख्येने शेतकरी हमीभावाचा लाभ घेऊ शकणार नाहीत.

संयुक्त किसान मोर्चाच्या नेतृत्वाखाली १९ शेतकरी संघटनांनी आंदोलनाला पाठिंबा दिला आहे. सरकारने मूगाची १०० टक्के खरेदी करावी तसेच खत वितरणाशी संबंधित अडचणी दूर कराव्यात, अशी त्यांची प्रमुख मागणी आहे. शेतकरी मुख्यमंत्री निवासाकडे मोर्चा काढण्याच्या तयारीत असून, परिस्थिती लक्षात घेता प्रशासनाने मोठा पोलीस बंदोबस्त तैनात केला आहे.

शेतकऱ्यांचे म्हणणे आहे की, तूर, उडीद आणि मसूर पिकांसाठी १०० टक्के एमएसपी खरेदीची तरतूद असताना मूगासाठी ती लागू नाही. त्यामुळे अनेकांना खुल्या बाजारात कमी दराने पीक विकावे लागत आहे. वाढता उत्पादन खर्च, खरेदीतील विलंब आणि नोंदणीतील अडचणी यामुळे ग्रामीण भागात नाराजी वाढत असून, सरकारने तातडीने निर्णय घ्यावा, अशी शेतकऱ्यांची मागणी आहे.