Madhya Pradesh - Chhattisgarh Election News: मध्य प्रदेश आणि छत्तीसगड विधानसभा निवडणुकीसाठी भाजपने तयारीला वेग दिला असून उमेदवारांची पहिली यादीही जाहीर केली आहे. भाजपने मध्य प्रदेशमध्ये 39 उमेदवारांची घोषणा करण्यात आली आहे. याशिवाय छत्तीसगडमधील 21 उमेदवारांची नावे जाहीर करण्यात आली आहेत.

मध्य प्रदेशात भाजपने ज्या ३९ उमेदवारांची नावे जाहीर केली आहेत, त्यापैकी तीन महिला आहेत. पहिल्या यादीत मध्य प्रदेशचे मुख्यमंत्री शिवराज सिंह चौहान यांचे नाव नाही. ते सीहोर जिल्ह्यातील बुधनी मतदारसंघातून निवडणूक लढवत आहेत.

सतना जिल्ह्यातील चित्रकूट मतदारसंघातून भाजपने सुरेंद्र सिंह गहरवार यांच्या नावाची घोषणा केली आहे. याशिवाय छतरपूर मतदारसंघातून भाजपने ललिता यादव यांना उमेदवारी दिली आहे. सुमावलीमधून अदल सिंग कंसाना आणि पिचोरमधून प्रीतम सिंग लोधी यांना संधी मिळाली. प्रीतम सिंह लोधी हे ज्येष्ठ नेत्या उमा भारती यांच्या जवळचे मानले जातात. गोहड राखीव जागेवरून लालसिंग आर्य, चाचोडा येथून प्रियंका मीना यांना उमेदवारी जाहीर करण्यात आली आहे. (Latest Marathi News)

छत्तीसगडमधील २१ पैकी ५ महिला उमेदवार

छत्तीसगडबद्दल बोलायचे झाले तर, तेथे भाजपने २१ पैकी ५ महिलांना उमेदवारी दिली आहे. येथे भाजपने बस्तर या आदिवासी राखीव जागेवरून मणिराम कश्यप यांना तिकीट दिले आहे. सेफ सीट मोहला मानपूर येथून संजीव साहा यांना संधी मिळाली आहे.

याशिवाय अभानपूरमधून इंद्रकुमार साहू, खैरागडमधून विक्रांत सिंह, कांकेरमधून आशाराम नेता यांना तिकीट देण्यात आले आहे. रामविचार नेताम यांना रामानुजगंजमधून तर शकुंतला सिंग पोर्थे यांना प्रतापपूरमधून उमेदवारी देण्यात आली आहे. प्रेम नगरमधून भुलनसिंग मरावी यांना उमेदवारी जाहीर झाली आहे. छत्तीसगडमधूनही माजी मुख्यमंत्री रमण सिंह यांच्या नावाची घोषणा अद्याप झालेली नाही.

दरम्यान, भाजपने बुधवारीच मध्य प्रदेश आणि छत्तीसगडसंदर्भात निवडणूक समितीची बैठक बोलावली होती. यात राज्याचे प्रभारी, गृहमंत्री अमित शाह , भाजप अध्यक्ष जेपी नड्डा आणि संघटन सरचिटणीस बीएल संतोषही उपस्थित होते. पंतप्रधान नरेंद्र मोदी यांच्या अध्यक्षतेखाली झालेल्या या बैठकीत उमेदवारांच्या नावांवर चर्चा झाली. त्यानंतर आज पहिली यादी जाहीर करण्यात आली आहे.