लडाखच्या उपराज्यपालांनी पाच नवीन जिल्ह्यांच्या निर्मितीसाठीच्या अधिसूचनेला मंजुरी दिली आहे. नायब राज्यपाल व्ही. के. सक्सेना यांनी 'एक्स' या सोशल मीडिया प्लॅटफॉर्मवरील एका पोस्टमध्ये ही घोषणा केली आहे. या पाच नवीन जिल्ह्यांच्या निर्मितीमुळे लडाखमधील जिल्ह्यांची एकूण संख्या आता सात होणार आहे. या निर्णयामुळे शासन नागरिकांच्या अधिक जवळ येईल आणि विकास, रोजगार व उद्योजकतेसाठी नवीन संधी निर्माण होतील, असे सक्सेना म्हणालेत.

लडाखमध्ये पाच नवीन जिल्हे :

नुब्रा

शाम

चांगथांग

झांस्कर

द्रास

उपराज्यपाल व्ही. के सक्सेना यांनी आपल्या सोशल मीडियाच्या एक्स या प्लॅटफॉर्मवर लिहिले की, लडाखसाठी आजचा दिवस ऐतिहासिक आहे. मी लडाखमध्ये पाच नवीन जिल्हे निर्माण करण्याच्या सूचनेला मुंजरी दिली आहे. यामुळे लडाखच्या लोकांच्या आकांक्षा आणि प्रदीर्घ काळापासूनची मागणी पूर्ण झाली आहे. नुब्रा, शाम, चांगथांग, झांस्कर आणि द्रास या पाच नवीन जिल्ह्यांच्या निर्मितीमुळे लडाखमध्ये आता दोनऐवजी सात जिल्हे असणार आहेत. हा विकास पंतप्रधान नरेंद्र मोदी यांच्या विकसित आणि समृद्ध लडाखच्या दूरदृष्टी आहे."

तळागाळापर्यंत शासकीय योजना पोहोचतील

उपराज्यपालांनी पुढे लिहिले, "गृहमंत्री अमित शाह यांच्या नेतृत्वाखाली गृह मंत्रालयाने ऑगस्ट २०२४ मध्येच मंजूर केलेला हा परिवर्तनकारी निर्णय तळागाळातील प्रशासनाला बळकट करेल. प्रशासनाचे विकेंद्रीकरण करेल आणि लडाखच्या लोकांना विशेषतः जे दुर्गम भागात राहतात त्यांना सार्वजनिक सेवांचा जलद आणि निश्चित पुरवठा होईल.

आपल्या सोशल मीडिया पोस्टमध्ये उपराज्यपाल म्हणाले की, नवीन जिल्ह्यांची निर्मितीमुळे सामान्य व्यक्तींपर्यंत शासन पोहोचेल. विकास, रोजगार आणि उद्योगाच्या नवीन संधी निर्माण होतील. या ऐतिहासिक निर्णयाचा लाभ लडाखच्या प्रत्येक नागरिकाला होईल. आपण सर्व मिळून एका उज्ज्वल, अधिक सामर्थ्यवान आणि अधिक समृद्ध भविष्याकडे वाटचाल करू.