पश्चिम बंगालमधील कोलकाता विमानतळावर बुधवारी सकाळी एक धक्कादायक प्रकार समोर आला. मुंबईला जाणाऱ्या एअर इंडियाच्या विमानात हायजॅक करण्याची धमकी मिळाल्याने विमानतळावर एकच गोंधळ उडाला. विमानातील स्वच्छतागृहाच्या आरशावर धमकीचा मेसेज लिहिलेला आढळून आला. हा प्रकार लक्षात येताच विमानाच्या वैमानिकाने तातडीने एअर ट्रॅफिक कंट्रोलला (ATC) याची माहिती दिली. त्यानंतर विमानतळावरील सुरक्षा यंत्रणा तात्काळ कामाला लागली.

मिळालेल्या माहितीनुसार, एअर इंडियाचे हे विमान मुंबईच्या दिशेने उड्डाण करण्याच्या तयारीत होते. सर्व काही सुरळीत सुरू असतानाच विमानाच्या स्वच्छतागृहातील आरशावर हायजॅक करण्याबाबतचा मेसेज लिहिलेला दिसून आला. हा संदेश पाहिल्यानंतर परिस्थितीचे गांभीर्य लक्षात घेऊन वैमानिकाने तातडीने संबंधित अधिकाऱ्यांना सतर्क केले.

घटनेची माहिती मिळताच विमानाला मुख्य पार्किंगपासून दूर असलेल्या आइसोलेशन बे येथे नेण्यात आले. त्यानंतर CISF जवानांसह विमानतळावरील सुरक्षा अधिकाऱ्यांनी तपासणी सुरू केली. विमानाच्या आतील प्रत्येक भागाची काळजीपूर्वक झडती घेण्यात येत आहे. कोणतीही संशयास्पद वस्तू किंवा धोकादायक बाब आढळते का, याची तपासणी सुरक्षा पथकांकडून केली जात आहे.

दरम्यान, विमानाच्या आरशावर धमकीचा मेसेज कोणी लिहिला, याचा शोध घेण्याचे कामही सुरू झाले आहे. यासाठी विमानातील प्रवाशांची माहिती तपासली जात आहे. तसेच विमानतळ आणि विमानामधील सीसीटीव्ही कॅमेऱ्यांचे फुटेजही तपासले जात आहे. या घटनेमुळे कोलकाता विमानतळावरील सुरक्षा व्यवस्था वाढवण्यात आली आहे.