पश्चिम सिंहभूम जिल्ह्यातील कुमारडुंगी पोलीस स्टेशन परिसरात अंधश्रद्धेची एक भयानक घटना घडली आहे. एकाच कुटुंबातील तीन जणांना पेट्रोल टाकून जाळण्यात आले आहे. धक्कादायक म्हणजे या घरात चेटकिणीचा वास्तव असल्याच्या संशयातून या कुटुंबाला जाळलं असल्याचं समोर आलं आहे. या दुर्घटनेत एका ३२ वर्षीय महिलेला आणि तिच्या दोन महिन्याच्या बाळाचा, तसेच घरातील एका सदस्याचा जळून मृत्यू झाला आहे. या भयावह घटनेनंतर पोलिसांनी गुन्हा दाखल करत तपास सुरु केला आहे.

मिळालेल्या माहितीनुसार, सदर घटना झारखंडमधील कुमारडुंगी पोलिस स्टेशन हद्दीतील कलैया गावात घडली आहे. मंगळवारी रात्री ९ वाजताच्या सुमारास ४० वर्षीय कोल्हान सिंकू, त्याची दुसरी पत्नी ३२ वर्षीय ज्योती सिंकू, त्याचा दोन वर्षांचा मुलगा आणि त्यांच्या दोन महिन्यांच्या बाळासह घरी झोपला होता. तेव्हा त्याच गावातील त्याची चुलत बहीण रशिका बिरुवा हिने बाहेरून हाक मारली. आवाज ऐकून कोल्हाण त्याची पत्नी ज्योतीसह बाहेर आला. त्याच वेळी त्याची पहिली पत्नी जानी सिंकू देखील बाहेर आली.

यादरम्यान कोल्हानच्या अंगणात गावकरी जमले होते. त्यांचं असं म्हणणं होत की, कोल्हानची दुसरी पत्नी चेटकीण आहे. या गोंधळानंतर कोल्हाणने जमावाला शांत करत पंचायत बैठकीत निर्णय घेतला जाईल असे सांगितले. मात्र अंधश्रद्धेच्या विळख्यात अडकलेल्या जमावाने ऐकले नाही. याच जमावातील एकाने गॅलन पेट्रोल काढून कुटुंबावर ओतले. त्यानंतर काडी पेटवून कुटुंबाला जाळण्यात आले. आग पेटताच सर्वत्र आरडाओरड सुरू झाली. आगीच्या ज्वाळांनी वेढलेला कोल्हान सिंकू पळून जाण्यात यशस्वी झाला. वाटेत त्याने आपले जळलेले कपडे काढून टाकले आणि कुमारडुंगी पोलिस स्टेशन गाठलं.

घडलेल्या घटनेची माहिती पोलिसांना सांगत तक्रार दाखल केली. कोल्हानच्या तक्रारीवरून पोलिसांनी घटनास्थळी धाव घेतली. घटनेचा पंचनामा करून मृतदेह शवविच्छेदनासाठी पाठवण्यात आले. तसेच कोल्हानच्या म्हणण्यानुसार आरोपींवर गुन्हा दाखल करण्यात आला असून पोलीस या घटनेचा सविस्तर तपास करत आहेत.