गोवा: सुमारे 250 प्रवाशांसह इस्रायली विमान एल अलने सोमवारी पहाटे फक्त एका इंजिनसह गोवा दाबोळी विमानतळावर आपत्कालीन लँडिंग केले. बोईंग 787 फ्लाइटच्या पायलटला इंधन गळतीचे सूचक दिवे दिसले आणि प्रोटोकॉलनुसार प्रभावित इंजिन बंद करावे लागले आणि आपत्कालीन लँडिंगची मागणी केली. परराष्ट्र मंत्रालयाने अधिकार्‍यांशी संपर्क साधला आणि भारत सरकारच्या नियमांनुसार प्रत्येक प्रवाशाची आरटीपीसीआर चाचणी केल्यानंतर प्रवासी आणि क्रू यांना जवळच्या हॉटेलमध्ये एक रात्र घालवण्याची परवानगी दिली.

गोवा हवाई बंदराचे संचालक गगन मलिक यांनी दिलेल्या माहितीनुसार, पहाटे 4 वाजता विमानाचे गोवा विमानतळावर आपत्कालीन लँडिंग करण्यात आले. "हे विमान बँकॉकहून तेल अवीवला जात होते, आणि त्यात सुमारे 250 प्रवासी होते. तथापि, इंजिनमध्ये समस्या निर्माण झाली आणि विमानाचे गोवा विमानतळावर तात्काळ लँडिंग करण्यात आले. त्यात सुमारे 50 थाई प्रवासी आणि 200 इस्रायली प्रवासी होते. "इमर्जन्सी लँडिंगमुळे कोणीही प्रवासी जखमी झाले नाही. या प्रवाशांना तेल अवीवला परत घेण्यासाठी दुसरे विमान आज गोव्यात येईल," असे मलिक यांनी सांगितले.

Edited By: Pravin Dhamale