इराणच्या कोर्टावर शस्त्रधारकांनी दहशतवादी हल्ला केल्याची माहिती मिळत आहे. शस्त्रधारकांनी केलेला हा हल्ला दहशतवादी हल्ला असल्याचं बोललं जात आहे. या हल्ल्यात ५ जणांचा मृत्यू झाला आहे. तर तीन दहशतवादी ठार झाल्याची माहिती मिळाली आहे. हल्लेखोरांनी ग्रेनेड हल्ला केला. मृतांमध्ये लहान मुलांचाही समावेश आहे.

इराणमध्ये कोर्टावर झालेल्या हल्ल्यात १३ जण जखमी झाले आहेत. या हल्ल्याची जबाबदारी जैश अल-जुल्म या संघटनेने घेतली आहे. इराणने या संघटनेला दहशतवादी संघटना घोषित केलं आहे. कोर्टाच्या परिसरात घुसून दहशतवाद्यांनी नागरिकांवर गोळीबार सुरु केला. या घटनेने कोर्ट आवारातील निष्पाप नागरिकांचा मृत्यू झाला. तर काही जण जखमी झाले.

इराणच्या इस्लामिक रिवोल्यूशन गार्ड्स कोरने सांगितलं की, 'सुरक्षा दलाच्या जवानांनी तीन दहशतवाद्यांचा खात्मा केला आहे. सुरक्षा दलाच्या जवानांनी घटनेनंतर परिस्थिती नियंत्रणात आणली आहे.

अफगाणिस्तान आणि पाकिस्तान सीमेलगतचा हा दहशतवादी समूह ड्रग्सच्या तस्करी करत आहे. या दहशतवाद्यांच्या मुसक्या आवळण्याचे काम इराणच्या सुरक्षा दलाकडून केलं जात आहे. ऑक्टोबर महिन्यात इराण पोलिसांच्या ताफ्यावर हल्ला करण्यात आला होता. त्यावेळी १० पोलीस अधिकाऱ्यांचा मृत्यू झाला होता. सिस्तान आणि बलूचिस्तान प्रांत हा इराणमधील सर्वात मागास भागांपैकी एक मानला जातो. हा भाग सुन्नी मुस्लिम बहुल आहे. या भागातील सुन्नी आणि इराणमधील शिया समुदाय यांच्यातील संबंध दीर्घकाळापासून तणावपूर्ण आहेत.