IndiGo flight engine failure Chennai airport latest news : इंडिगोच्या एका विमानाचे उड्डाण केल्यानंतर काही वेळातच डावे इंजिन बंद पडल्याची धक्कादायक घटना घडली. त्यामुळे चेन्नई विमानतळावर तातडीने इमर्जन्सी घोषित करण्यात आली. विमानामध्ये तांत्रिक बिघाड झाल्याचे लक्षात येताच वैमानिकाने प्रसंगावधान राखत तात्काळ चेन्नई विमानतळावरील एटीसीसोबत (हवाई वाहतूक नियंत्रण कक्ष-ATC) संपर्क साधला आणि विमानाचे सुरक्षित इमर्जन्सी लँडिंग केले.

मंगळवारी रात्री उशिरा कोलकाताहून आलेल्या इंडिगोच्या विमानाचे लँडिंगच्या काही वेळापूर्वी डावे इंजिन निकामी झाल्याने चेन्नई विमानतळावर पूर्ण आणीबाणी जाहीर करण्यात आली होती. या घटनेमुळे विमानतळावर भीतीचे वातावरण तयार झाले होते. पण विमानतळ प्रशासनाच्या सतर्कतेमुळे व इमर्जन्सी टीमच्या वेळेवर केलेल्या नियोजनामुळे विमानावरील सर्व प्रवासी सुरक्षित असून एक मोठा अपघात टळला आहे.

भारतीय विमानतळ प्राधिकरणाच्या (AAI) अधिकाऱ्यांनी दिलेल्या माहितीनुसार, कोलकाता ते चेन्नई दरम्यान २२४ प्रवाशांना घेऊन जाणाऱ्या इंडिगो फ्लाइट 6E-723 मध्ये ११ ऑगस्ट रोजी रात्री ११.२९ वाजता पूर्ण आणीबाणी जाहीर करण्यात आली. विमान रात्री ११.३० वाजता पोहोचणार होते, परंतु विमान उतरवण्याची तयारी करत असताना वैमानिकाच्या लक्षात आले की डावे इंजिन बंद पडले आहे. त्याने हवाई वाहतूक नियंत्रण कक्षाला याची माहिती दिली.

त्यानंतर विमानतळ प्रशासनाने विमानाचे सुरक्षित लँडिंग सुलभ करण्यासाठी आपत्कालीन प्रतिसाद उपाययोजना सक्रिय केल्या. विमानातील सर्व २२४ प्रवाशांसह रात्री ११.३७ वाजता रनवे २५ वर सुरक्षितपणे उतरले. रात्री ११.४७ वाजता संपूर्ण आणीबाणी मागे घेण्यात आली.