अमित शहा यांनी डॉ. बाबासाहेब आंबेडकर यांचा अपमान केल्याचा आरोप विरोधी पक्षांनी केला आहे. त्यानंतर काँग्रेस अध्यक्ष मल्लिकार्जुन खरगे यांनी पत्रकार परिषद घेऊन त्यांच्या राजीनाम्याची मागणी केली.

गृहमंत्री अमित शहा यांनी डॉ. बाबासाहेब आंबेडकर यांच्याबद्दल केलेलं वक्तव्य अपमानजनक आहे. त्यांनी आतापर्यंत राजीनामा द्यायला हवा होता, असा हल्लाबोल काँग्रेसचे अध्यक्ष मल्लिकार्जुन खरगे यांनी केला. तसंच पंतप्रधान नरेंद्र मोदी यांना डॉ. बाबासाहेब आंबेडकरांबद्दल आदर असेल तर, त्यांनी आज रात्री १२ पर्यंत अमित शहा यांना मंत्रिमंडळातून काढून टाकावे.' अशी मागणीही त्यांनी पंतप्रधान नरेंद्र मोदी यांच्याकडे केली.

गृहमंत्री अमित शहा यांच्या राज्यसभेतील विधानावरून गदारोळ सुरूय. विरोधी पक्षांकडून आरोप होत आहेत. अशातच मल्लिकार्जुन खरगे यांनी अमित शहांवर टीका केलीय. गृहमंत्र्यांच्या वक्तव्यावरून कोट्यवधी देशवासीय दुखावले गेले आहेत. त्यामुळे त्यांना मंत्रिमंडळात राहण्याचा अधिकार नाही. राज्यसभेत त्यांनी राज्यघटनेचा अपमान केलाय. जर भाजप किंवा पंतप्रधान नरेंद्र मोदी यांना बाबासाहेब आंबेडकरांबद्दल थोडा जरी आदर असेल तर, अमित शहा यांना तातडीने मंत्रिमंडळातून काढून टाकावे, अशी मागणी मल्लिकार्जुन यांनी पंतप्रधान नरेंद्र मोदींकडे केलीय.

पंतप्रधान मोदींनी अमित शहा यांना मंत्रिमंडळातून हटवावे

पत्रकार परिषदेत मल्लिकार्जुन यांनी अमित शहांना मंत्रिमंडळातून हटवण्याची मागणी केलीय. 'बाबासाहेबांबद्दल कुणी चुकीचे बोलले तर, त्यांना मंत्रिमंडळातून काढून टाकायला हवे होते. अमित शहा यांनी राजीनामा द्यावा आणि जर पंतप्रधान मोदींना डॉ. बाबासाहेब आंबेडकरांबद्दल आदर असेल तर, त्यांनी आज रात्री १२ पर्यंत त्यांना मंत्रिमंडळातून काढून टाकावे, असे खरगे म्हणाले.

भाजपच्या नेत्यांचा संविधानावर विश्वास नाही. भाजप स्वर्ग - नरकाच्या गोष्टी करतात. मनुस्मृतीचीही चर्चा करतात. मनुस्मृतीमध्ये स्वर्ग नरक काय हे स्पष्ट लिहिले आहे आणि तीच मानसिकता पंतप्रधान मोदी आणि अमित शहा यांची आहे, असाही हल्लाबोल काँग्रेसचे राष्ट्रीय अध्यक्ष मल्लिकार्जुन खर्गे यांनी केलाय.