एक मोठी बातमी समोर आली आहे. हरियाणा विधानसभा निवडणुकीची तारीख बदलण्यात आली आहे. आधी येथे १ ऑक्टोबरला मतदान होणार होते. मात्र आता ही तारीख रद्द करण्यात आली आहे. आता येथे ५ ऑक्टोबर रोजी मतदान होणार आहे, अशी घोषणा निवडणूक आयोगाने केली आहे.

यासोबतच जम्मू-काश्मीर आणि हरियाणा विधानसभा निवडणुकीसाठी मतमोजणी तारीख आता ४ ऑक्टोबर ऐवजी ८ ऑक्टोबर करण्यात आली आहे. या दोन्ही राज्यांचे निवडणूक निकाल ८ ऑक्टोबरला जाहीर होतील.

का घेण्यात आला हा निर्णय?

निवडणूक आयोगाने म्हटले आहे की, 'बिष्णोई समाजाच्या मतदानाचा हक्क आणि परंपरा यांचा आदर करण्यासाठी हा निर्णय घेण्यात आला आहे. ज्यांनी आपल्या गुरू जंभेश्वरांच्या स्मरणार्थ आसोज अमावस्या उत्सवात सहभागी होण्याची जुनी परंपरा कायम ठेवली आहे.''

दरम्यान, याआधी निवडणूक आयोगाने जाहीर केले होते की, ९० सदस्यांच्या हरियाणा विधानसभेसाठी १ ऑक्टोबर रोजी मतदान होणार आहे. तसेच ४ ऑक्टोबर रोजी निकाल जाहीर होणार होते. सध्या राजकीय पक्षांमध्ये आपापले उमेदवार जाहीर करण्यासाठी विचारमंथन सुरू आहे.

मुख्यमंत्री नायब सिंग सैनी कुरुक्षेत्रातील लाडवा मतदारसंघातून विधानसभा निवडणूक लढवणार असल्याचे वृत्त आहे. भाजपच्या हरियाणा राज्याचे अध्यक्ष मोहनलाल बडोली यांनी ही माहिती दिली.